Իվետա Մուկուչյանը հունական հաղորդման ժամանակ հայտարարել է, թե Ղարաբաղն Ադրբեջանի տարածքում է. տեսանյութ

«Եվրատեսիլ 2016» երգի միջազգային մրցույթում Հայաստանը ներկայացնող Իվետա Մուկուչյանը հունական հեռուստաընկերություններից մեկի հաղորդաշարի ժամանակ ճիշտ չի մեկնաբանել Լեռնային Ղարաբաղի հարցը: Հաղորդավարը երգչուհուն հարց է տվել Լեռնային Ղարաբաղ մասին, որին ի պատասխան Իվետա Մուկուչյանն ասել է, թե Լեռնային Ղարաբաղն Ադրբեջանի տարածքում է, բայց այն Հայաստանի երկրորդ հանրապետությունն է: «Լեռնային Ղարաբաղն Ադրբեջանի տարածքում է, բայց այն Հայաստանի երկրորդ հանրապետությունն է, որը դեռ Ադրբեջանի հողի վրա է: Դա տարածք է, որի շուրջ  քննարկումներ են ընթանում, թե այն ում է պատկանում՝ ադրբեջանցիներն ասում են, որ դա իրենց է պատկանում, հայերն ասում են, որ իրենցն է»,- ասել է նա՝ նշելով, որ Լեռնային Ղարաբաղի հարցի շուրջ քննարկումներ են ընթանում, որոնք մերթընդմերթ ընդհատվում են: Երգչուհու կցկտուր խոսքերից ակնհայտորեն երևում է, որ նա պատրաստ չի եղել պատասխանել Լեռնային Ղարաբաղի վերաբերյալ հարցին ու շփոթվում է՝ փորձելով ներկայացնել ԼՂ հակամարտության պատմությունը: Հաղորդման սկզբում Իվետան պատմել է նաև իր ընտանիքի մասին, պատմել Մկրտիչ Արզումանյանի «Փախի´ր կամ ամուսնացի´ր» ֆիլմում նկարահանումների մասին:  Երգչուհին գնահատանքի բարձր խոսքեր է հղել նաև Մկրտիչ Արզումանյանի հասցեին: Տեսանյութում Լեռնային Ղարաբաղին վերաբերող հատվածն սկսվում է  16:15 րոպեից: