Ռուսաստանցի երկրպագուների ձերբակալության պատճառով Ֆրանսիայի դեսպանին ՌԴ ԱԳՆ են կանչել

Մոսկվայում Ֆրանսիայի դեսպան Ժան-Մորիս Ռիպերին կանչել են Ռուսաստանի ԱԳՆ՝ կապված ռուսաստանցի երկրպագուների ձերբակալության հետ: Այս մասին հաղորդում է ՌԴ ԱԳՆ պաշտոնական կայքը: «Ֆրանսիացի դիվանագետի ուշադրությունը հրավիրվել է Ռուսաստանի քաղաքացիների նկատմամբ կիրառված խտրական բնույթի միջոցների ուղղությամբ. Մարսելի դատախազի որոշմամբ՝ բոլոր 43 անձինք, ներառյալ՝ երեք վարորդները, 48-ժամյա կալանքի են ենթարկվել՝ հետաքննական գործողություններ իրականացնելու համար»,- նշել են ԱԳՆ-ում: Մոսկվայում անթույլատրելի են համարում այն, որ «Ֆրանսիայում ռուսական հյուպատոսական հաստատությունները  տեղյակ չեն պահվել տեղի ունեցածի մասին»: Հունիսի 14-ի առավոտյան Կաննի արվարձանում ֆրանսիական իրավապահները կանգնեցրել են Երկրպագուների համառուսական միավորման ներկայացուցիչներին եւ Ռուսաստանի ֆուտբոլի հավաքականի մյուս երկրպագուներին, որոնք ուղեւորվելիս են եղել Լիլ՝ Եվրո 2016-ի շրջանակում Ռուսաստան-Սլովակիա խաղին հետեւելու: Նրանց կալանավորել են՝ ստուգելու համար հունիսի 11-ին ֆրանսիական այդ քաղաքում տեղի ունեցած բախումներին  նրանց մասնակցությունը: