Մենք մշտապես փորձում ենք խուսափել Ռուսաստանի հանդեպ թշնամական հռետորիկայից. Կվիրիկաշվիլի

Sputnik լրատվական գործակալության փոխանցմամբ` Վրաստանի վարչապետ Գեորգի Կվիրիկաշվիլին Բեռլինում հանդիպել է Գերմանիայի կանցլեր Անգելա Մերկելի հետ, ինչից հետո կազմակերպվել է համատեղ մամուլի ասուլիս: Կվիրիկաշվիլին դրա ժամանակ հայտարարել է, որ Վրաստանում տեղի ունեցած իշխանափոխությունից հետո երկրի նոր կառավարությունը փոխել է վերաբերմունքը Ռուսաստանի հանդեպ, ինչը սակայն չի իրականացվել տարածքային ամբողջականության հարցում փոխզիջումների հաշվին: «Մենք մշտապես փորձում ենք խուսափել Ռուսաստանի հանդեպ թշնամական հռետորիկայից: 2012 թվականից սկսած` մենք փոխել ենք այդ հարցում կառավարության դիրքորոշումը, դարձել ենք առավել կառուցողական, սակայն ևս մեկ անգամ ընդգծում եմ, որ դրանում չկա որևէ փոխզիջում` կապված երկրի տարածքային ամբողջականության ու ինքնիշխանության հետ»: Կվիրիկաշվիլին ընդգծել է, որ այս կամ այն բլոկին Վրաստանի անդամակցելը վտանգ չի ներկայացնում Ռուսաստանի համար: Նա հավելել է, որ Վրաստանը ձգտում է վերականգնել Աբխազիայի ու Ցխինվալի շրջանի վստահությունը: «Մեզ համար շատ կարևոր է ոչ միայն տարածքների վերադարձը, այլև մարդկանց հաշտեցումն ու ժողովուրդների միավորումը: Մեզ համար շատ կարևոր է մեր աբխազ ու օս եղբայրների ու քույրերի հետ վստահության վերականգնումը: Մենք նպատակամղված քաղաքականություն ենք իրականացնում այդ ուղղությամբ»: