ՀԱԿ-ը իշխանությանը տվել է իր համաձայնությունը

Հունիսի 15-ին, հնարավոր է վերսկսվեն 4+4+4 ֆորմատով բանակցությունները իշխանության, ընդդիմության եւ քաղաքացիական հասարակության միջեւ: Ենթադրվում է, որ բանակցությունները կավարտվեն առնվազն քաղաքական ուժերի միջեւ կոնսենսուսի կայացման մասին հայտարարությամբ: 4+4+4 ձեւաչափով ԸՕ փոփոխությունների շուրջ քննարկումները մեկնարկեցին մայիսին, սակայն մի քանի նիստից հետո ընդդիմությունն ու քաղհասարակության ներկայացուցիչները առկախեցին քննարկումները՝ հայտարարելով, որ իշխանությունը պատրաստ չէ գնալ ռադիկալ փոփոխությունների եւ կատարել համատեղ ներկայացրած հինգ պահանջները։ Հիշեցնենք, որ ընդդիմության եւ քաղհասարակության այս ֆորմատում ներկայացված պահանջներն էին՝ ընտրական տեղամասերի տեսանկարահանում եւ առցանց դիտման հնարավորություն, մատների թանաքոտում, կրկնակի քվեարկությունը բացառելու համար քվեարկությանը մասնակցածների ցուցակների հրապարակում եւ ընտրացուցակների մաքրում: Հետագայում ՀԱԿ-ն ավելացրեց եւս մեկ պահանջ՝ հրաժարվել ռեյտինգային քվեարկությունից եւ ընտրություններն անցկացնել դասական համամասնական ընտրակարգով, որի դեպքում Հայաստանը պետք է դիտվի մեկ միասնական ընտրատարածք։ Հունիսի 1-ին խորհրդարանը 102 կողմ ձայներով ընդունեց Ընտրական օրենսգիրքը եւ այն արդեն ուժի մեջ է մտնել։ Թվում է, թե իշխող Հանրապետականն որեւէ խնդիր չպետք է ունենար կոնսենսուսի ձեռքբերման համար, սակայն չհերքված տեղեկություններ կան, որ այդ կոնսենսուսը օդ ու ջրի պես անհրաժեշտ է իշխանություններին, որովհետեւ միայն այդ պարագայում է հնարավոր միջազգային կառույցներից գումարներ կորզել։ Մյուս կողմից՝ դժվար է պատկերացնել, թե ինչ զիջումների կարող է գնալ ՀՀԿ-ն, որպեսզի հնարավոր լինի հասնել կոնսենսուսի։ Կառավարության աշխատակազմի ղեկավար-նախարար Դավիթ Հարությունյանը այս հարցի վերաբերյալ ասել է, որ քննարկումների ժամանակ ՀՀ իշխանությունը կասի, թե ինչ է զիջելու: Բայց պարզից էլ պարզ է, որ օրինակ իշխանությունը չի հրաժարվի տարածքային կամ ռեյտինգային կոչվող ցուցակներից, քանի որ դա մեծամասնականի այլընտրանքային տարբերակն է, որը հնարավորություն կտա իշխանություններին վերարտադրվել։ Այս ամենը քաջ գիտակցում են նաեւ ընդդիմադիրները, նախեւառաջ ՀԱԿ-ը,որին իշխանություններն արդեն շաբաթներ շարունակ փորձում են համոզել կոնսենսուսի հարցում։ Փաստը, որ ՀԱԿ-ը համաձայնել է վերսկսել բանակցությունները, կնշանակի, որ հավատում է իշխանություններին, պատրաստ է որոշակի կոմպրոմիսի գալ կոնսենսուսի հարցում։ Այն որ, ՀԱԿ-ը լեզու է գտել իշխանությունների հետ, ոչ բացահայտ խոստովանում են նաեւ ՀՀԿ-ականները։ ՀՀԿ խմբակցության պատգամավոր Հովհաննես Սահակյանը, անդրադառնալով ընտրական օրենսգրքի հետ կապված խնդիրներին, լրագրողների հետ զրույցում նշել է, որ իրականում կոնսենսուս գոյություն ունի: «102 կողմ ձայները վկայում են կոնսենսուսի մասին», Սահակյանն ասել է, որ խնդիրը քաղհասարակությունն է.«Խնդիրը իշխանությունն ու ընդդիմությունը չէ, խնդիրը նաև քաղաքացիական հասարակությունն է, միջազգային այն հանրությունը, այն փորձագետները, ովքեր նաև իրենց եզրակացութունը պետք է տան, թե այդ դրույթները այս կարճ ժամանակահատվածում արդյո՞ք հնարավոր են իրագործել, թե՞ ոչ»։ Սահակյանը ասել է, որ կուսակցություններից քննարկումներ են ունեցել միայն ՀԱԿ խմբակցության հետ, քանի որ դժգոհություններ միայն նրանք են բարձրացրել, սակայն քննարկումները հետո կլինեն 4+4+4 ձևաչափով, որում բոլոր քաղաքական ուժերն են: Պատգամավորը հավելեց, որ քննարկումներին վերջում կմասնակցի նաև քաղաքացիական հասարակությունը:Սակայն տեղեկություններ կան, որ քաղհասարակությունը վճռական է տրամադրված եւ չի պատրաստվում իշխանության հետ նորից քննարկման սեղանի շուրջ նստել, քանի դեռ ներկայացրած պահանջները չեն կատարվել։ Անի Սահակյան