Գործն ուղարկվել է ՀՔԾ

Հունիսի 4-ին Նուբարաշենի խճուղում ԵՊՀ բանասիրության ֆակուլտետի հայոց լեզվի ամբիոնի դոցենտ Փառանձեմ Մեյթիխանյանի ամուսնու՝ 58-ամյա Եղիշե Խաչատրյանի դաժան սպանության գործը երեկ դատախազությունից ուղարկվել է ՀՀ հատուկ քննչական ծառայություն: Այս մասին ի պատասխան մեր հարցին ասացին ՀՀ գլխավոր դատախազության հանրային կապերի բաժնից: Քրեական գործը ՀՔԾ ուղարկելու պատճառն այն է, որ ույն գործով մեղադրյալ 26-ամյա Խաչիկ Կոսյանը ԴԱՀԿ աշխատակից է: Քննիչի որոշմամբ նրա լիազորությունները դադարեցվել են: Հունիսի 4-ին՝ ժամը 23-00-ի սահմաններում, Երեւան քաղաքի Նուբարաշենի խճուղի 5/1 հասցեի դիմաց մի խումբ անձինք վիճաբանել են 58-ամյա Եղիշե Խաչատրյանի հետ՝ երթեւեկության կանոնները խախտելու համար դիտողություն անելու կապակցությամբ, ապա 75-ամյա մոր ներկայությամբ հայհոյել ու բռնություն գործադրել նրա նկատմամբ՝ բազմաթիվ հարվածներ հասցնելով նրա կենսական կարեւոր օրգանի՝ գլխի, ինչպես նաեւ՝ կրծքավանդակի եւ որովայնի շրջաններում։ Ստացած մարմնական վնասվածքներից Եղիշե Խաչատրյանը տեղում մահացել է: Սույն քերական գործի շրջանակներում որպես մեղադրյալ է ներգրավել 3 անձ: Մասնավորապես մեղադրանք է առաջադրվել 26-ամյա Խաչիկ Կոսյանին՝ ՀՀ ՔՕ 104-րդ հոդվածի 2-րդ մասի 7-րդ եւ 10-րդ կետերով (սպանություն՝ մի խումբ անձանց կողմից խուլիգանական դրդումներով): Նա կալանավորվել է: Իսկ Կոսյանի աներորդին՝ 23-ամյա Արտաշես Չիչոյանը եւ ընկերը՝ 26-ամյա Արարատ Նիկողոսյանը հետախուզվում են: