Երկիրը մաս-մաս վաճառելով՝ պահում են իշխանությունը. Ժ. Սեֆիլյան

Այսօր կայացած մամլո ասուլիսի ժամանակ «Նոր Հայաստան» հանրային փրկության ճակատի քաղաքական խորհրդի անդամ Ժիրայր Սէֆիլյանը խոսելով ապրիլի առաջին օրերին ղարաբաղա-ադրբեջանական շփման գծում ադրբեջանական կողմից սանձազերծված պատերազմի մասին, նշեց. «Իշխանություններն իրենց վերարտադրության խնդիրը լուծելու համար դիմել են տարբեր միջոցների, որոնց մեջ եղել է նաև՝ մեր երկիրը մաս առ մաս վաճառելը: Այս տարիների ընթացքում բոլորս ականատես ենք եղել, թե ինչպես են այդ մարդիկ՝ արտաքին գործոնն օգտագործելով, մեր երկիրը մաս-մաս վաճառելով, պահել իրենց իշխանությունը: Այլևս բան չի մնացել վաճառելու, հերթը հասել է Արցախին: Այն, ինչ ասում եմ, ասում եմ ամենայն պատասխանատվությամբ և ցավով: Այո, Սերժ Սարգսյանն իր իշխանությունը երկարացնելու նպատակով շահարկում է Արցախի խնդրի լուծումը՝ դրա դիմաց մեծ խոստումներ ստանալով: Այդ խոստումների մեջ մտնում են նաև մեծ գումարներ, որոնցով իր իշխանությունը պետք է երկարացնի»: Սէֆիլյանն ընդգծեց՝ բոլորս ականատես ենք, թե ինչպիսի պատրաստակամությամբ է Սերժ Սարգսյանը խոսում 5 շրջանները զիջելու մասին. «Տեսախցիկներից հեռու տարբեր ձևաչափերի հանդիպումներ են լինում, որոնց մասին մենք տեղեկանում ենք, որտեղ նա նշում է, որ պատրաստ է հայկական զորքերն անմիջապես դուրս բերել այդ տարածքներից: Ադրբեջանցիներն ասում են՝ 6,5 շրջան, Սերժ Սարգսյանն ասում է՝ ոչ, 5 շրջան: Հասել ենք այն օրվան, որ մի օր Սերժ Սարգսյանի շուրթերից լսելու ենք՝ հանուն խաղաղության պետք է գնանք զիջումների»: