Ինչ է հայտնի Էջմիածնում Հ. Պատուրյանի սպանությունից և ինչ նոր ալիբի է ի հայտ եկել Վ. Սախկալյանի գործում

Հունիսի 5-ին Էջմիածնում տեղի ունեցած սպանության գործի վերաբերյալ քննության ընթացքում հայտնաբերված անհերքելի փաստերի՝ տեսագրությունների հիման վրա հիմնավորվել է սպանության հիմնական կասկածյալ Վարդան Սախկալյանի ալիբին` այլուրեքությունը: Ավելի կոնկրետ՝ նա հանցագործության ժամանակ Էջմիածնում չի եղել, իսկ հանցագործությունը կատարելու ժամին եղել է Երևանի Սարյան փողոցում: Այս մասին տեղեկանում ենք ՀՀ քննչական կոմիտեից, որտեղից առանց նշելու կասկածյալի տվյալները, հայտնեցին, որ 42-ամյա Համլետ Մայիսի Պատուրյանի սպանության 26-ամյա կասկածյալի այլուրեքությունը պարզվել է: Հիշեցնենք, որ հունիսի 5-ին՝ ժամը 00:35-ի սահմաններում, հրազենային վնասվածքներով Վաղարշապատի բժշկական կենտրոն էր տեղափոխվել Էջմիածին քաղաքի Վռամ Կոստանյան փողոցի բնակիչ, 42-ամյա Համլետ Մայիսի Պատուրյանի դին: Պարզվել էր, որ ժամը 00:10-ի սահմանում անհայտ անձը Էջմիածին քաղաքի Շահումյան 75 հասցեում՝ նախկին պլաստմասայի գործարանի տարածքում, կրակոցներ է արձակել Հ. Պատուրյանի ուղղությամբ` սպանելով նրան: Սպանությունը կատարելու կասկածանքով նույն օրը ձերբակալվել էր Էջմիածին քաղաքի Նալբանդյան 1ա հասցեի բնակիչ, 26-ամյա Վարդան Էդուարդի Սախկալյանը, որը օրեր անց ազատ արձակվեց: Փաստի առթիվ հարուցված է քրեական գործ՝ ՀՀ քր. օրենսգրքի 104 հոդվածի 1-ին մասի և 235 հոդվածի հատկանիշներով և քննությունը շարունակվում է: Մեր  տեղեկություններով՝ սպանվածը Հայաստան էր վերադարձել Վոլգոգրադից, ըմբշամարտիկ էր և բազմաթիվ բարեգործական աշխատանքներ էր կատարել Էջմիածնում: Մասնավորապես  իր միջոցներով մարզական կենտրոն էր ստեղծել,որի վրա ծախսել է 1.5 միլիոն  և մեծ օգնություն էր ցուցաբերել սոցիալապես անապահով ընտանիքներին: Ամուսնացած էր, խնամքին ուներ 2 որդի, 1 դուստր: Նշենք,որ նա համարվում էր քրեական հեղինակություն: