Կառավարությունը դադարեցնո՞ւմ է «Նաիրիտ»-ի գործունեությունը

Այսօր ԱԺ-կառավարություն հարցուպատասխանի ժամանակ ՀԱԿ խմբակցության ղեկավար Լևոն Զուրաբյանը հայտարարեց, որ այս տարի մարտին ՀՀ էներգետիկայի և բնական պաշարների նախարար Լևոն Յոլյանի հրամանով աշխատանքային խումբ էր ստեղծվել, որը պետք է ուսումնասիրեր «Նաիրիտ» գործարանի վիճակն ու հետագա աշխատանքների վերաբերյալ առաջարկություններ ներկայացներ:«Ստեղծվել էր աշխատանքային խումբ՝ «Նաիրիտ»-ի առկա վիճակն ուսումնասիրելու համար։ Նախատեսված էր, որ աշխատանքային խումբը կարճ ժամանակահատվածում պետք է ներկայացներ առաջարկություններ՝ գործարանի հետագա զարգացման անհրաժեշտ միջոցառումների վերաբերյալ։ Սակայն խմբի եզրակացությունը մինչ օրս չի հրապարակվել։ «Նաիրիտ»-ի աշխատակիցներն էլ աշխատանքից ազատման ծանուցումներ են ստացել։ Արդյո՞ք նշանակում է, որ կառավարությունը նախատեսում է դադարեցնել «Նաիրիտ»-ի գործունեությունը»։ Էներգետիկայի և բնական պաշարների նախարար Լևոն Յոլյանը նշեց, որ աշխատանքային խումբը ստեղծվել է իր հրամանով՝ մարտ ամսին։ Այս ընթացքում ուսումնասիրվել են գործարանի քիմիկատները։ «Մենք պայմանավորվածություն ունենք ԱԻ նախարարի հետ՝ դրանց վնասազերծման հետ կապված: «Նաիրիտի» պահպանության խնդիրները պետք է իրականացնեն համապատասխան լիազորություն և փորձառություն ունեցող կազմակերպությունները: Նույնպես ԱԻՆ նախարարի հետ տարվում են աշխատանքներ «Նաիրիտի» պահպանման աշխատանքներ կազմակերպելու համար»,- ասաց Լ.Յոլյանը: