Վիզաների կենտրոնում նվաստացնում են մեր քաղաքացիներին. Նաիրա Զոհրաբյան

Վիզաների կենտրոնում Հայաստանի քաղաքացիներին նվաստացնում են: Այս մասին այսօր՝ հունիսի 7-ին, ԱԺ հայտարարությունների ժամին ասաց ԲՀԿ խմբակցության ղեկավար Նաիրա Զոհրաբյանը: «Ինձ դիմել են քաղաքացիները, ովքեր այս շրջանում ցանկանում են մեկնել հանգստի եւ պատմել վիզաների կենտրոն հաստատության մասին, որտեղ մի նվաստացուցիչ պրոցես է ընթանում վիզայի թույլտվություն ստանալու համար։ Մարդկանց գետտոյի նման մտցնում են բոլորին մի սենյակ՝ ծծկեր երեխայից մինչեւ տարեց, բոլորին նույն ժամն են նշանակում, ապա աշխատակիցը ժամերով նայում է  փաստաթղթերը։ Այդ գողգոթան անցած ընտանիքները պատմեցին, թե դա ինչ նվաստացուցիչ է։ Վիզաների կենտրոնը ներմուծվեց այն պատճառաբանությամբ , թե իբր դեսպանատներում հերթեր են գոյանում։  Բացի այդ, մարդկանց գործերը սկրեպով ամրացնելու եւ դեսպանատուն ուղարկելու համար լրացուցիչ գումար են գանձում, սկրեպի գինը՝  12 հազար դրամ։ Բայց այստեղ էլ չի վերջանում խնդիրը։ Այդ նվաստացումն անցնելուց հետո մարդիկ չեն ազատվում դեսպանատուն գնալուց։ Վիզաների կենտրոնում այդ ռիտուալը անցնելուց հետո, նորից նույնը անցնում են դեսպանատանը, հետո նորից իրենց անձնագրի համար վերադառնում վիզաների կենտրոն»,-նշեց Զոհրաբյանը՝ կոչ անելով ՀՀ արտգործնախարարությանը լուծել այս հարցը։ Նաիրա Զոհրաբյանը հիշեցրեց, որ վիզաների կենտրոնը ստեղծվել է, որ կենտրոնացված որեւէ տեղ լինի, դեսպանատներում հերթեր չգոյանան, որ վիզային գինը իջնի, սակայն ապարդյուն: