Ասացի` եղբայր, ուզում եմ նայել աչքերիդ մեջ. Արագած Ախոյանը դիմել է թուրքին /տեսանյութ/

ԱԺ պատգամավոր Արագած Ախոյանն օրերես այցելել է Թուրքիայի Ազգային Մեծ ժողով: Պատգամավորն արդեն քանի տարի հետամուտ է իր որդեգրած գաղափարը իրականության վերածելու սկզբունքի իրականացմանը: Նա ցանկանում է բարի դրացիական հարաբերություններ ձևավորել Հայաստան-Թուրքիա քաղաքական մշակույթի կոնտեքստում: Թուրք դիվանագետ Ուֆուկ Ուրասն այս առնչությամբ նկատել է, որ 2016-ին, երբ արդեն ետևում է  մնացել 1915-ի 100 ամյակը, հնարավոր է ավելի սառնարյուն, կառուցողական հարաբերություններ հաստատել: Հայելի.am-ի թղթացի  հետ զրույցում Արագած Ախոյանը փաստեց, որ ինքը պարբերաբար լինում է Թուրքիայում.«Անկարայում երկու տարի առաջ մի հրաշալի ֆորում կազմակերպեցինք 100-ամյակի տարելիցի նախաշեմին: Բավականին լուրջ, կառուցողական ելույթներ եղան»: Պատգամավորը վերջին երկօրյա այցելության ընթացքում հանդիպել է ոչ միայն թուրք, այլ նաև Թուրքիայի Մեջլիսում ներկայացված երեք հայ պատգամավորների հետ: Արագած Ախոյանն առանձնակի հպարտությամբ խոսեց Սելինա Դողանի հետ ունեցած իր հանդիպման մասին.«Երբ մտա նրա սենյակ, աչքիս ընկավ գոբելեն մի գործվածք, որի վրա գրված էր` հավերժ փառք մեր հերոս պապերին»:                     Արագած Ախոյանն առանձնազրույցներ է ունեցել հայազգի երեք պատգամավորների հետ, այնուհետև դիվանագիտական լուրջ զրույցներ է ունեցել թուրք պատգամավորների հետ: Նա իր տղայի հարսանիքին է հրավիրել պատգամավորներին:                                               ԱԺ պատգամավորը տեղեկացրեց, որ թուրք պատգամավոր Ուֆուկ Ուրասը բավականին հետաքրքիր հրապարակմամբ է հանդես եկել հանդիպումից հետո.«Նա խոսել է գույքի և ունեցվածքի վերադարձի մասին և նշել, որ պետք է ճանաչել ցեղասպանությունը: Ուրասը միակ պատգամավորն էր , որ Աբդուլա Գյուլի հետ եկավ Հայաստան` ֆուտբոլային խաղի ժամանակ, ավելի ուշ նա հանդես եկավ ելույթով, որտեղ նկատեց, որ անելիքները շատ են և հարկավոր է առաջ գնալ ու առարկայական գործողությունների դիմել»,-նշեց Արագած Ախոյանը: Քաղաքական գործիչը, ով Մուշ քաղաքում գտել է իր պապի տունը, ցանկանում է վերագտնել կորսված հայրենիքը: Մեր հարցադրմանը, թե արդյոք կարելի է վստահել մեր դարավոր թշնամու երդմանը կամ հայանպաստ քաղաքականությանը, Ախոյանը արձագանքեց.«Հրանտ Դինքի 62 ամյակի հետ կապված միջոցառման օրերին ես խոսք էի ուղղել թուրք ժողովրդին, որտեղ նշել էի, որ խոսքս ուղղում եմ բոլոր նրանց, ովքեր հայոց Ցեղասպանության ճանաչման մեջ իրենց շահն են փնտրում: Թուրքիայում շատ մարդիկ կան, ովքեր լավ հասկանում են, որ առանց պատմությունը մաքրելու Թուրքիան ապագա չունի: Թուրքիան նման է մի վերքի, որ երեսից լավանում է, բայց տակից անընդհատ փտում է: Դա թուրքերն էլ լավ հասկանում են: Նշեմ, որ Թուրքիայի կապիտալի 40 տոկոսը հիմնված է հայերից խլված ունեցվածքի վրա և պետք է դա շարունակ ընդգծել »,- նշեց Արագած Ախոյանը : «Անկախ նրանից այս շփումները հաճելի են, թե հաճելի չեն, թե թշնամի են կամ ոչ` պետք է խոսենք: Երրորդ երկրների միջոցով բավական է մեր հարցերը լուծենք: Շփման եզրերը հնարավոր է գտնել : Երբ ես նստած էի մի ընդդիմադիր թուրք պատգամավորի հետ և խոսում էի դեմ առ դեմ, ես նրան ասացի` ես քեզ հետ խոսում եմ որպես տղամարդը` տղամարդու հետ: Ես մարդ եմ, ում պապերը եղել են այս երկրի քաղաքացիներ: Այս երկրում ես ունեցվածք և բարոյական խնդիրներ ունեմ: Ասացի` եղբայր,  ուզում եմ նայել աչքերիդ մեջ և նա աչքերը փախցրեց»,-պատմեց Արագած Ախոյանը: Ախոյանի մուտքը Թուրքիա տարբեր որակավորումներ է ստացել: Քաղաքական գործիչը պնդում է, որ փորձելու է հաստատակամ քայերով առաջ գնալ: Իսկ թե ինչպես են արձագանքում այս ամենին Հայաստանում հարցին` պատգամավորը բազմանշանակ ժպտաց: Լուսինե Ղազարյան Մանրամասները` տեսանյութում: