Թուրք պատգամավորներին սպանությամբ են սպառնում

Գերմանիայի Բունդեսթագի կողմից Հայոց ցեղասպանության ճանաչման մասին բանաձևի ընդունումից հետո, ազգությամբ թուրք բոլոր պատգամավորներին սպանությամբ են սկսել սպառնալ, գրում է գերմանական Die Zeit թերթի առցանց հրատարակությունը: «Կանաչներից» պատգամավոր Օզքան Մութլուն, ելույթ ունենալով գերմանական հեռուստաալիքով, հայտարարել է աննախադեպ սպառնալիքների մասին, որոնց բախվել են թուրքական արմատներով բոլոր 11 պատգամավորները, փոխանցում է Deutsche Welle-ն: Անկարայի քաղաքապետը Twitter-ում հրապարակել էր լուսանկար, որում բոլոր այդ պատգամավորներն են: Արդյունքում այն տարածել են սոցկայքի հազարավոր օգտատերեր` սպանության կոչ անելով: Մութլուն անհանգստանում է, որ իշխանությունների ներկայացուցչի նման քայլը թուրքերի շրջանում կարող է որակվել որպես գործողություն սկսելու հանձնարարություն: «Նման խելագարների ձեռքով Թուրքիայում շատերն են մահացել»,- նշել է պատգամավորը: