Ծանր վիրավորումներ ստացած զինծառայող Էրիկը 2 ամիս անց սկսել է խոսել, ինքնուրույն շնչել

Ապրիլյան պատերազմի ընթացքում առաջիններից մեկը վիրավորված Էրիկ Բաբայանի առողջական վիճակում բավականին դրական տեղաշարժ կա: Երկու օր առաջ նա սկսել է խոսել, ինքնուրույն շնչել` առանց արհեստական շնչառության սարքի: Ու եթե մինչ այժմ երբեմն-երբեմն իրեն այցելող 9 ամսական դստեր` Էլիզայի հետ Էրիկը միայն լուռ էր հաղորդակցվում, այժմ արդեն հայր ու աղջիկ սկսել են «զրուցել»: Երկու ամսվա լռությունից հետո Էրիկը նաեւ առաջին անգամ պատմել է հարազատներին, թե ինչպես սկսվեց պատերազմը, ինչպես ինքը վիրավորվեց` մեկը մյուսին հաջորդած երկու արկի պայթյունից, ինչպես ընկավ գետնին: «Շատ արյուն է կորցրել, հետո հասցրել են Մարտակերտի զինվորական հոսպիտալ, այնտեղ վիրահատություն է արվել, հեռացրել են երիկամը, փայծաղը, այնուհետեւ վիրահատել են ստամոքսը, աղիքները: Վիրահատությունը 7 ժամ տեւեց: Արյուն ներարկեցին, մի քիչ վիճակը կայունացրին, ապրիլի 3-ին տեղափոխեցին Ստեփանակերտի հոսպիտալ, 4-ին` Երեւանի «Էրեբունի» բժշկական կենտրոն: Այստեղ նորից վիրահատեցին: Երեք անգամ: Փառք Աստծո, հիմա վիճակը դեպի լավն է գնում»,- մեր զրույցում ասաց ժամկետային զինծառայող, 27-ամյա Էրիկի մայրը` Ալվինա Կարապետյանը: Միառժամանակ հետո որդուն անհրաժեշտ կլինի եւս մեկ վիրահատություն` կոնքազդրային հոդի պրոթեզավորման նպատակով: Էրիկն արդեն հոգնել է, ուղիղ երկու ամիս պառկած է մեջքի վրա, ցավեր է ունենում, բայց պետք է պայքարի ու պայքարում է: Հարազատները սպասում են նրա ապաքինվելուն: Լեռնային Ղարաբաղից եկել են, ժամանակավոր բնակություն հաստատել Հայաստանում,  որ մոտիկ լինեն, ուժ հաղորդեն: Էրիկի մայրն ապրում է Երեւանում` հարազատների տանը, կինը` ծնողների ու երեխայի հետ` Չարենցավանում վարձակալած բնակարանում: «Եթե մեր պետությունը հնարավորություն ունենա, գոնե մի քիչ օգնի, մի տուն հատկացնի, մարդիկ հավաքվեն, իրար հետ ապրեն. իրենց երեխան դեռ երկար բուժման կարիք է ունենալու»,- հուշելով ասաց Էրիկի հորաքույրը: Վիրավոր զինծառայողի հարազատները բուժման նպատակով նրան արտերկիր տեղափոխելու մասին առայժմ չեն մտածում: Նշում են, որ նման հարց կարող է առաջ գալ ավելի ուշ, երբ հերթը հասնի կոնքազդրային հոդի վիրահատությանը: «Դեռ այդպիսի հարց չկա, երբ ժամանակը գա ոտքի վիրահատության, իմանանք` այստեղ հնարավորություն չկա, կտանեմ: Մյուս օրգանների հետ կապված բուժումը այստեղ շատ լավ է կազմակերպվում: Կարող եմ ասել` անչափ ուշադիր են»,- գոհունակությամբ ընդգծեց Ալվինա Կարապետյանը: Նա աշխատում է Արցախի հիվանդանոցներից մեկում: Ասաց, որ չնայած տեւական բացակայությանը, աշխատանքը պահպանվում է: Նաեւ վճարվում է: Էրիկի աշխատավարձի վճարումը նույնպես չի դադարեցվել: Տիկին Ալվինան փոխանցեց պաշտպանության նախարար Սեյրան Օհանյանի խոսքերը,  ըստ որոնց` պայմանագրային զինծառայողների աշխատավարձը կպահպանվի վեց ամիս: «Էրեբունի» բժշկական կենտրոնի վերակենդանացման բաժանմունքի ղեկավար Արմեն Մուրադյանը, անդրադառնալով Էրիկ Բաբայանի առողջական ներկայիս վիճակին, ասաց.  «Էրիկի վիճակն այս պահի դրությամբ գնահատում ենք դեռ ծանր, բայց ունենք հստակ կայունացում: Ունեցել ենք բազմաթիվ, բազմազան պրոբլեմներ, որոնք հաղթահարելով, քայլ առ քայլ առաջ ենք գնում: Այս պահի դրությամբ Էրիկը պարզ գիտակցություն ունի, խոսում է: Մինչեւ նախորդ օրը նա տրախոստոմիկ խողովակով էր, այսինքն` շնչափողի մեջ խողովակ էր դրված եւ դրանով էր շնչում: Մենք դա երկու օր առաջ հեռացրել ենք, հիմա ինքնուրույն շնչում է, սնվում է: Ունենք ընթացիկ խնդիրներ: Առաջինը իհարկե ձախ թոքի կարգավիճակն է, որտեղ որոշակի պրոբլեմներ կան: Փորձում ենք դրանք հաղթահարել: Կան հետվիրահատական վերքեր, որոնք երկրորդային ձգումով են լավանում, դրանց ենք հետեւում: Կա նաեւ ձախ կոնքազդրային հոդի պրոբլեմը, որն իհարկե ոչ այս էտապում լուծվելիք խնդիր է: Պետք է իրավիճակը հստակ կերպով բարելավվի, ինքը չունենա ոչ մի վերքային մակերես, թոքի կարգավիճակը պետք է լավ լինի, որ մենք կարողանանք այդ վիրահատական միջամտությունն իրականացնել»: Դա հնարավոր է կազմակերպվի ամիսներ անց: Վերակենդանացման բաժանմունքից հիվանդասենյակ տեղափոխելու մասին նույնպես դեռ վաղ է խոսել: Արմեն Մուրադյանը կարծիք հայտնեց, որ կոնքազդրային հոդի վիրահատության նպատակով Էրիկին արտերկիր տեղափոխելու անհրաժեշտություն չի լինի: «Մեզ մոտ բավականին մեծ փորձ ունեն նմանատիպ վիրահատության: Բարեհաջող կատարվում է այդ վիրահատությունը եւ լավագույն արդյունքներ են լինում»,- փաստեց նա: Հ.Գ. Այն մարդկանց, որոնք ցանկություն կունենանֆինանսական աջակցություն ցուցաբերել Էրիկ Բաբայանին,փոքր-ինչ թեթեւացնել նրա հարազատների ուսերին ծանրացածհոգսը, տեղեկացնենք, որ բացվել է հաշվեհամար: Առայժմ դաչի հրապարակվել եւ որեւէ փոխանցում չկա արված:Հաշվեհամարը հետեւյալն է. ARTSAKHBANK ARMENIA KARAPETYAN ALVINA USD - 22323001311000 (դոլար) AMD - 22303117688402 (դրամ)