Թուրքիան չպետք է Եվրամիության անդամ դառնա՝ առանց Հայոց ցեղասպանությունը ճանաչելու. Անտոնիա Արսլա

Թուրքերի զայրացած արձագանքը ցույց է տալիս, թե նույնիսկ 101 տարի անց որքան կարեւոր է Գերմանիայի կողմից Հայոց ցեղասպանության ճանաչումը: Այս մասին Corriere della Sera պարբերականին տված հարցազրույցում հայտարարել է հայկական արմատներով իտալացի գրող, հանրահայտ «Արտույտների ագարակը» գրքի հեղինակ Անտոնիա Արսլանը: Որքանո՞վ է կարեւոր Բունդեսթագի հայտարարությունը հիմա՝ մեկ դար անց Եվրախորհրդարանն արդեն երեք անգամ խոստովանել է, որ Թուրքիան չպետք է Եվրամիության անդամ դառնա՝ առանց Հայոց ցեղասպանությունը ճանաչելու: Սակայն մեծ կշիռ կարող են ունենալ Եվրահանձնաժողովի կամ ազգային խորհրդարանների որոշումները: Հատկապես՝ Բեռլինի: Քանի որ 120 տարի Գերմանիան նախ Օսմանյան կայսրության, այնուհետեւ՝ ժամանակակից Թուրքիայի դաշնակիցն է: 1914 թվականին պատերազմի մեջ մտնելով՝ գերմանական Ռեյխը զորքեր ուղարկեց՝ Օսմանյան կայսրությունը վերակազմավորելու համար, առեւտրային համաձայնագրեր կնքեց: Գերմանացի բանվորները սկսեցին Բեռլին-Բաղդադ ճանապարհ կառուցել, եւ այդ բանվորները, սարսափած տեսածից, սկսեցին փրկել հայերին՝ նրանց ներկայացնելով որպես իրենց ընկերներ: Այս ճանաչումը միայն ձեւական չէ՞ Իհարկե՝ ձեւական է, բայց թուրքերի զայրացած արձագանքը ցույց է տալիս, թե որքան կարեւոր է այն: Դա ուժեղ ազդանշան է: Պատմաբանների 98%-ը համակարծիք է սրան՝ 1913-16 թվականներին Կոնստանդնուպոլսում ամերիկյան դեսպան Հենրի Մորգենթաուի օրագրերի, հրեաների վկայությունների հիման վրա, որոնք անհանգստությամբ էին հետեւում կատարվածին՝ մտավախություն ունենալով, որ նույնը նաեւ իրենց հետ տեղի կունենա: