Ինչ են սպասում Մոսկվայից` ԼՂ հարցով
Գերմանիայի արտգործնախարար Ֆրանկ Վալտեր Շտայնմայերը հայտարարել է, որ աշխարհում անկարելի է լուծել որևէ խնդիր՝ առանց Ռուսաստանի մասնակցության, սակայն դա չի վերացնում երկխոսության բարդությունը: «Աշխարհում չկա որևէ խնդիր, որի լուծումը չպահանջի Ռուսաստանի մասնակցություն՝ ներառյալ Սիրիան, Լիբիան, Լեռնային Ղարաբաղը: Սակայն դա չի վերացնում փոխհարաբերություններում առկա թերըմբռնումն ու մնացած բարդությունները»,- հայտարարել է Գերմանիայի արտգործնախարարը: ԵԱՀԿ-ում նախագահող Գերմանիայի արտոգործնախարարի կողմից նման հայտարարությունն անսպասելի չի կարելի համարել: Ռուսաստանն ու Գերմանիան ԼՂ կարգավորման գործընթացը, կարծես, միասնական ջանքերով առաջ տանելու մղում ունեն: Հիշենք, թե ինչ հայտարարեց Ռուսաստանի արտգործնախարար Սերգեյ Լավրովը` Երևանում: Ղարաբաղյան կարգավորման գործընթացում Ռուսաստանի հետագա կոնկրետ քայլերին անդրադառնալով` նա Էդվարդ Նալբանդյանի հետ համատեղ ասուլիսում նշեց, թե սկզբունքային է համարում թույլ չտալ` այնպիսի խախտումներ, որոնք կվնասեն հրադադարի պահպանմանը: Նրա խոսքով`վերջին տարիներին Ռուսաստանի միջնորդությամբ համաձայնեցվել են քայլեր, որոնք պետք է կյանքի կոչել: «2011թ. ԵԱՀԿ-ն ճանապարհային քարտեզ էր պատրաստել, թե ինչպես է պետք առաջ ընթանալ այդ քայլերում։ Կարևոր է, որպեսզի Գերմանիան՝ որպես ԵԱՀԿ-ում նախագահող երկիր, որը մեծ հետաքրքրություն է ցուցաբերում հակամարտությունների կարգավորմանը, հետաքրքրություն ցուցաբերի նաև այստեղ: Պետք է նպաստենք, որպեսզի Բեռլինը գիտակցի իր պատասխանատվությունը», հայտարարեց Լավրովը։ Նկատենք, որ Ռուսաստանի դերի մասին բազմիցս հայտարարում է նաև պաշտոնական Բաքուն: Պարբերաբար «Լավրովի պլանի» մասին ամիսներ շարունակ էր խոսվում, երեկ էլ Բաքվից հերթական հայտարարությունն է հնչել... Ադրբեջանի նախագահի հասարակական-քաղաքական հարցերով օգնական Ալի Հասանովը նախ հայտնել է, որ Ղարաբաղյան հակամարտությունը կքննարկվի ավելի դինամիկ ձևով և կստանա իր լուծումը: Նրա խոսքով՝ կան միջազգային իրավունքի նորմեր, որոնց համաձայն՝ նման հակամարտությունները պետք է լուծվեն խաղաղ ճանապարհով: Խոսելով Ղարաբաղյան հակամարտության գոտում վերջին սրացման մասին՝ Հասանովը հայտարարել է. «Ապրիլի 4-ից սկսած՝ միջազգային կազմակերպությունները կրակը դադարեցնելու մասին հայտարարություններով դիմեցին Հայաստանին ու Ադրբեջանին: Բնականաբար, նրանք ունեն դրա իրավունքը, միջազգային իրավունքի նորմերը պահանջում են, որ հակամարտությունը կարգավորվի խաղաղ ճանապարհով: Այդ պատճառով էլ Ադրբեջանը հարկադրված դադարեցրեց պատերազմը, և դրանում իր հիմնական դերն է ունեցել Ռուսաստանի նախագահ Վլադիմիր Պուտինը»: Ռուսաստանի դերը ղարաբաղյան կարգավորման գործընթացում Ադրբեջանի կողմից մեծացնելը, հավանաբար, ունի լրջագույն պատճառներ` կապված Մոսկվայից ակնկալիքների հետ: Գուցե այն պահանջները, որոնք այսօր դրված են Բաքվի առջև, կապված սահմանային միջադեպերի ուսումնասիրության հետ, Ադրբեջանը ցանկանում է Ռուսաստանի աջակցությամբ խափանե՞լ: Ու ոչ միայն... Գուցե ավելի գլոբալ և առարկայական սպասելիքներ կան ղարաբաղյան կարգավորման գործընթացում Մոսկվայից` Հայաստանի նկատմամբ հնարավոր ճնշումների ակնկալիքով: Մետաքսյա Շալունց
Հետևեք մեզ Viber-ում
