Բինալի Յըլդըրըմը՝ Բունդեսթագում Հայոց ցեղասպանության ճանաչման մասին

Թուրքական Anadolu լրատվական գործակալության փոխանցմամբ՝ Թուրքիայի վարչապետ Բինալի Յըլդըրըմը կտրականապես դատապարտել է հունիսի 2-ին Բունդեսթագի կողմից Հայոց ցեղասպանությունը ճանաչող բանաձևի առաջիկա քննարկումը: «Մենք թաքցնելու բան չունենք: Թող ամեն ինչ ուսումնասիրվի, այդ թվում՝ բոլոր երկրների պատմությունները: Թող ի հայտ բերվեն յուրաքանչյուր կողմի սխալները: Սակայն դա պետք է անեն պատմաբանները: Արմատապես սխալ է պատմական թեման քաղաքականության առարկա, այդ թվում նաև ներքին առարկա դարձնելը: Կանխակալ փաստաթղթի ընդունման դեպքում կտուժեն Գերմանիայի ու Թուրքիայի հարաբերությունները: Անկասկած, մենք չենք ցանկանում դա: Բունդեսթագի կողմից 1915 թվականի դեպքերի մասին օրինագծի շուրջ քվեարկություն անցկացնելն անհեթեթություն է, չկան մոտիվներ: Այդ իրադարձությունները տեղի են ունեցել Առաջին համաշխարհային պատերազմի ընթացքում: Դրանք սովորական գործընթացներ էին, որոնք այդ ժամանակ տեղի են ունեցել յուրաքանչյուր հասարակությունում, յուրաքանչյուր երկրում: Մենք գիտենք, որ նրանք, ովքեր փորձում են մեղադրել Թուրքիային, չունեն բարի մտադրություններ: Բաց և հստակ համայն աշխարհին հայտնում ենք՝ մենք թաքցնելու ոչինչ չունենք այդ հարցում: Թող անցկացվեն բազմակողմ հետազոտություններ»,- հայտարարել է Յըլդըրըմը՝ հույս հայտնելով, որ նրանք, ովքեր որոշում կընդունեն Բունդեսթագում, չեն անտեսի 3.5 միլիոն ընտրողների (Գերմանիայի քաղաքացիություն ունեցող էթնիկ թուրքերի) կարծիքը: «Դրա համար էլ մենք չենք ցանկանում նման որոշումների ընդունում: Հուսով ենք, որ կհաղթի բանականությունը և չի ընդունվի մտահոգություն հարուցող որոշում: Բայց ինչ տեղի կունենա, եթե ամեն դեպքում ընդունվի: Մեծ հաշվով՝ ոչ մի բան: Նախորդ տարի նման որոշումներ ընդունել են մի շարք այլ երկրներ: Մեզ համար դա անիմաստ բան է, օրենքի ուժ չունեցող գործողություն: Եվ, այնուամենայնիվ, մենք կողմ չենք անիմաստ որոշումների ընդունմանը»,- նշել է Թուրքիայի վարչապետը: