Կրեմլի հիշեցումը Էրդողանին
RIA Novosti լրատվական գործակալության փոխանցմամբ՝ Ռուսաստանի նախագահի մամլո քարտուղար Դմիտրի Պեսկովը մեկնաբանել է Մոսկվայի հետ երկխոսության վերականգնմանն ուղղված քայլերի մասին Թուրքիայի նախագահ Ռեջեփ Էրդողանի խոսքերը: Նախօրեին Էրդողանը հայտարարել էր, որ Թուրքիան ցանկանում է վերականգնել Ռուսաստանի հետ հարաբերությունները, սակայն չի հասկանում, թե ինչպիսի առաջին քայլ է իրենից ակնկալում Մոսկվան: Պեսկովն ընդգծել է, որ իրեն իրավասու չի համարում խորհուրդ տալ որևէ այլ երկրի նախագահի, սակայն կարող է հիշեցնել Ռուսաստանի նախագահի խոսքերը, ինչպես նաև ամենատարբեր մակարդակներով արված ու տրված հայտարարություններն ու պարզաբանումները, որոնց համաձայն՝ ռուսական կողմն ակնկալում է «Սու-24» ինքնաթիռը խոցելու համար ներողության խնդրում, տեղի ունեցածի պատճառների պարզում, փոխհատուցման վճարում, այդ թվում նաև զոհված օդաչուի ընտանիքին: «Այդ ամենն ասվել է առանց հատուկ ակնարկների, դա անգամ պարզաբանվել է բավական միանշանակ, ամենատարբեր մակարդակներով՝ նախագահի գլխավորությամբ: Ցայժմ Թուրքիայի կողմից որևէ քայլ չի ձեռնարկվել տվյալ ուղղությամբ»,- ասել է Պեսկովը:
Հետևեք մեզ Viber-ում
