Վրաստանում ստեղծվելու է ռազմաօդային ուժերի հրամանատարություն
Sputnik լրատվական գործակալության փոխանցմամբ՝ Վրաստանում ստեղծվելու է ռազմաօդային ուժերի հրամանատարություն, որը կներառի ավիացիան ու օդային պաշտպանության ուժերը: Այդ մասին հայտնել է Վրաստանի ՊՆ մամլո ծառայությունը, որի հաղորդմամբ՝ համապատասխան քննարկումները տևել են մի քանի ամիս, և հարցը համաձայնեցված է Գլխավոր շտաբի հետ: Վրաստանի պաշտպանության նախարար Թինա Խիդաշելին հայտարարել է, որ իրենք ծրագրում են մինչև այս շաբաթվա ավարտը նշանակել օդային ուժերի նոր հրամանատար: Նա հույս է հայտնել, որ ռազմաօդային ուժերի հրամանատարության ձևավորման գործընթացը կավարտվի մինչև ընթացիկ ամսվա ավարտը: «Դա շատ կարևոր գործընթաց է, քանի որ օդային պաշտպանությունը մեր երկրի կարևոր առաջնահերթություններից մեկն է»,- ասել է նա: Խիդաշելին հավելել է, որ 2015 թվականի ամռանը Վրաստանին ՀՕՊ-ի տարրեր հատկացնելու շուրջ Ֆրանսիայի հետ ստորագրված պայմանագրի իրագործումը թևակոխել է ակտիվ փուլ. «Ավիացիան և օդային պաշտպանությունը Վրաստան-ՆԱՏՕ համատեղ փաթեթի առաջնահերթություններից մեկն է, և, ելնելով դրանից, շատ կարևոր է այդ բարեփոխումն ավարտել մինչև Վարշավայի գագաթնաժողով, նախքան Վրաստանի հանդեպ նոր գործիքների ու որոշումների ընդունում»: Ընթացիկ տարվա մարտին Վրաստանի ցամաքային զորքերը բաժանել են երկու հրամանատարության՝ Արևելյան ու Արևմտյան:
Հետևեք մեզ Viber-ում
