Հայոց ցեղասպանության խնդիրը ևս մեկ անգամ դառնում է միջազգային շահարկման խնդիր.Ռուբեն Մելքոնյան

ԵՊՀ արևելագիտության ֆակուլտետի փոխդեկան, թուրքագետ Ռուբեն Մելքոնյանը  Բունդեսթագում հայոց ցեղասպանության հարցի քննարկման   վերաբերյալ թուրքական արձագանքներին անդրադառնալով  Հայելի ակումբում  ասաց, թե թուրքական արձագանքները ստանդարտ են, սա թուրքական արտաքին քաղաքականությանը նետված մարտահրավեր է՝ արտաքին քաղաքականության ճարտարապետ Դավութօղլուի հեռանալուց հետո: «Սա առաջին մարտահրավերն է, որին թուրքական քաղաքականությունը փորձելու է դիմագրավել առանց արտաքին քաղաքականության ճարտարապետի, և նոր վարչապետի համար սա լինելու է առաջին միջազգային քննությունը: Բունդեսթագում 630 խորհրդարանական կա, և այս թիվը խոսում է բանաձևի քննարկման վտանգավոր լինելու մասին, քանի որ անցնելու հավանականությունը կապված է մի շարք խնդիրների հետ: Հարցը Բունդեսթագում անցնելու հավանականությունը քիչ է: Իհա՛րկե, կուզեմ սխալված լինել, բայց այն, որ ռեալ քաղաքական շահերը հաճախ բախվում են բարոյական խնդիրների հետ, և գերակայող են լինում ռեալ քաղաքական շահերը, դա, ըստ էության, աքսիոմատիկ ճշմարտություն է»,-նշեց Մելքոնյանը: Հնարավոր վտանգների մասին խոսելով էլ, նա ասաց, թե Գերմանիայում կա շատ հզոր թուրքական համայնք, որոնցից 3 միլիոնը Թուրքիայի քաղաքացիներ են, և հաջորդն այն է, որ թուրք-գերմանական հարաբերությունները շատ խորքային բնույթ ունեն, և այս հարցը կարող է էականորեն վնասել այդ հարաբերությունները: Ռուբեն Մելքոնյանն այն համոզմանն է , որ Հայոց ցեղասպանության խնդիրը ևս մեկ անգամ դառնում է միջազգային շահարկման խնդիր, այս անգամ արդեն՝ Գերմանիայի կողմից: Անդրադառնալով հատուցման խնդրին, Ռուբեն Մելքոնյանն ասաց, թե Գերմանիայի կողմից Ցեղասպանության ճանաչումն իր հետ բերելու է խնդիրներ, ոչ միայն ճանաչում, այլ նաև դատապարտում և հատուցում: