Էդվարդ Նալբանդյանը` կայանալիք Սարգսյան-Ալիև հանդիպման մասին
Այսօր ՀՀ ԱԳ նախարար Էդվարդ Նալբանդյանը` պատասխանելով ԲՀԿ խմբակցության ղեկավար Նաիրա Զոհրաբյանի հարցին, թե ճիշտ են այն լուրերը, որ հունիսի հանդիպմանը հնարավոր է կողմերի միջև ստորագրվի ինչ-որ համաձայնագիր, պատասխանեց, թե Վիեննայի հանդիպումից հետո հունիսին կայանալիք Հայաստանի և Ադրբեջանի նախագահների հանդիպման ժամանակ որևէ փաստաթուղթ ստորագրելու մասին խոսք չի կարող լինել: «Բանակցությունների հաջորդ փուլը կլինի հունիսին, որը նվիրված կլինի նրան, որպեսզի վերսկսեն բանակցությունները: Պարզ է մեկ բան, որ այդ բանակցությունների վերսկսման համար պետք է համապատասխան պայմաններ ստեղծվեն: Դրանց մասին խոսեցին հենց եռանախագահողները»,- ասաց Է.Նալբանդյանը: Ըստ նախարարի` այն, ինչ պայմանավորվել են կողմերը, արտացոլված է ԵԱՀԿ ՄԽ եռանախագահող երկրների համատեղ հայտարարության մեջ, որը կարող էր լինել նաև 5 երկրների կողմից, բայց քանի որ Ադրբեջանը հրաժարվեց դրանից, ստորագրեցին երեք կողմերը: Է.Նալբանդյանի խոսքով`դրանում նշվում է 94-95թթ. եռակողմ անժամկետ պայմանագրերի կարևորությունը, զինադադարի խախտման հետաքննության մեխանիզմի ներդրումը, ԵԱՀԿ անձնական ներկայացուցչի գրասենյակի լիազորությունների ընդլայնումը:
Հետևեք մեզ Viber-ում
