Դոնեցկում 300 հոգանոց խումբ է կազմվել, որն ուղարկվելու է Լեռնային Ղարաբաղ. Դմիտրի Տիմչուկ

Ուկրաինայի Գերագույն ռադայի պատգամավոր «Տեղեկատվական դիմադրություն» խմբի համակարգող Դմիտրի Տիմչուկը այսօր Facebook-ի իր էջում գրել է, թե իբր Դոնեցկի մոտ 300 բնակիչներից կազմվել է մի խումբ, որոնց ուղարկելու են Լեռնային Ղարաբաղ կռվելու: «Դոնեցկից Ռուսաստանի զինված ուժերի գլխավոր շտաբի Սանկտ Պետերբուրգի հետախուզական վարչություն են տեղափոխվել մոտ 300 գրոհայիններ, հիմնականում՝ հրաձիգներ ու ականազերծողներ: Գրոհայինների հագին եղել է ռուսական զինվորական հագուստ՝ վրան հայերեն ինչ-որ գրություն: Գրոհայիններից ստացած տեղեկատվության հմաձայն, խումբը դասընթացներ է անցնելու Ռուսաստանի տարածքում, ինչից հետո Լեռնային Ղարաբաղում մասնակցելու է ռազմական գործողությունների: Խմբի տեղափոխումն իրականացվել է «Урал» ավտոմեքենաներով»,-գրել է Տիմչուկը: Նա նշել է, թե դրա վերաբերյալ ամբողջական տեղեկատվությունը փոխանցվել է Ուկրաինայի հատուկ ծառայություններին, որոնք այն ստուգելու միջոցներ ունեն եւ համագործակցում են Ադրբեջանի հատուկ ծառայությունների հետ: Նշենք, որ նախկինում Տիմչուկը քանիցս իրականությանը չհամապատասխանող եւ երբեմն Ուկրաինայի ՊՆ-ի կողմից հերքված տեղեկույուններ է տարածել: