Կորցրած 800 հա տարածքին մեծ նշանակություն տա՞լ, թե չտալ

Հայ հասարակության քննարկումների օրակարգից արդեն մի քանի օր է չի իջնում նախագահ Սերժ Սարգսյանի ամենաշոկային հայտարարությունը՝ 800 հա տարածք հակառակորդին տալու մասին: Սերժ Սարգսյանը Վիեննայից վերադառնալու ճանապարհին հենց ինքնաթիռում խոստովանել էր, որ հայկական կողմը կարող էր վերականգնել ստատուս քվոն, հետ բերել այդ տարածքները, սակայն ռազմավարական և մարտավարական առումով այդ տարածքները որևէ նշանակություն չունեն, ուստի ինքը՝ իբրև գերագույն գլխավոր հրամանատար, որոշել է, որ չարժեր զոհեր տալ դրա համար: Նախագահի այս մոտեցումը միանշանակ չի ընկալվել հասարակության տարբեր շերտերի,եւ հատկապես, արցախյան ազատամարտի մասնակիցների, հրամանատարների կողմից, բայց ոչ քաղաքական ընդդիմություն հռչակված որոշ ուժերի կողմից։ Այսօր ԱԺ-ում ճեպազրույցների ժամին միայն «Ժառանգություն» կուսակցության ներկայացուցիչ Զարուհի Փոստանջյանն էր, որ դեմ խոսեց այդ մասին։Ըստ Զարուհի Փոստանջյանի, որքան էլ փորձում են քառօրյա պատերազմում կորցրած 800 հա տարածքը ներկայացնել՝ որպես ոչ նշանակալի, բայց ակնհայտ է, որ Թալիշը դրա պատճառով հայտնվել է Ադրբեջանի նշանառության տակ, Մարտակերտն անվտանգ չէ, մենք փաստորեն գյուղ ենք կորցրել։ Ընդդիմադիր պատգամավորը հայտարարեց, որ Սերժ Սարգսյանը սպասարկում է հակառակորդի քաղաքականությունը, և նա է երկրի գլխավոր սպառնալիքը։ Մինչդեռ ՀԱԿ խմբակցության ղեկավար Լևոն Զուրաբյանն ասաց, որ այսօր ավելի կարևոր հարց է պատերազմի և խաղաղության խնդիրը, որը մեր առաջ դրված է. «Ոչ թե ընկնենք սխալների հետևից, ավելի կարևոր հարցեր կան, քան այն, ինչի վրա կենտրոնացել եք: Այսօր դրված է Հայաստանի ու ԼՂ ապագայի խնդիրը, այս գիտակցությունը շատերի մոտ պակասում է: Ես ուրախ եմ, որ մեր հասարակությունը պատասխան է պահանջում պետական այրերից՝ իրենց ստերի համար, բայց այս պահին կան ավելի կարևոր գործեր: Մենք պետք է կարողանանք այս պատերազմից հաղթանակած դուրս գալ»,- ասաց նա: ՀՅԴ խմբակցության ղեկավար Արմեն Ռուստամյանը, ճիշտ է՝ «ռիսկ» չարեց մեկնաբանել Փոստանջյանին, բայց հայտնեց իր կարծիքը, որ շփման գիծն անընդհատ փոխվել է եւ դեռ կարող է փոխվել: «Էդ գիծը տվյալ պահի վրա պետք չի ֆիքսել, դա փոփոխական եղել է եւ կլինի: Այո, մի քանի դիրքեր իրենք վերցրել են, բայց գյուղ չի վերցվել: Եթե չի բնակեցված, անվտանգության պատճառով չի բնակեցված: Որպես բնակավայր՝ իրենք ոչ մի բնակավայր էլ չեն կարողացել վերցնել: Պատերազմական գործողությունները կանգնեցվել են, հրադադարը հաստատվել է իրենց իսկ խնդրանքով: Այստեղ էլ կարելի է մտածել, թե մենք ինչու եւս մեկ անգամ համաձայնեցինք իրենց խնդրանքին: ՀՀԿ խմբակցության ղեկավար Վահրամ Բաղդասարյանը վստահ հակադարձեց, որ Սերժ Սարգսյանը սպասարկում է սպասարկում է հայ ազգի շահն, ինչը չի կարելի ասել Փոստանջյանի մասին: Հարցին` համաձա՞յն է, որ վերջին 22 տարիների ընթացքում հայկական կողմը տարածք կորցրեց, Բաղդասարյանը պատասխանեց. «Նաև համաձայն եմ այն մտքի հետ, որ վերջին հազարամյակների ընթացքում հայ ժողովուրդը 90-ական թվականների հող ձեռք բերեց: Այդ հողը կորցնելը մի քիչ վերացական հասկացողություն է, քանի որ պետք է տեսնել՝ ի՞նչ կորցրեց, և եթե չկորցներ, ապա ի՞նչ կշահեր, և եթե դա հետ վերցինեին, ապա ի՞նչ կկորցնեինք: Ինձ թվում է, որ դրան պետք չէ այդպիսի մեծ նշանակություն տալ, եթե անհրաժեշտություն լինի, ես բացահայտ հայտարարում եմ, որ այդ ամենը վերադարձնելը մեկ-երկու օրվա խնդիր էր, բայց դրա արդյունքները և դրա հետևանքները կարող էին ծանր լինել: Եթե հողը որևէ ռազմավարական նշանակություն չունի, ապա ի՞նչ է նշանակում այդ տարածքներ վերցնել զոհերի միջոցով»: Անի Սահակյան