Վթարային շենքերի հարցը վարչապետը կքննի. Նարեկ Սարգսյան
ԱԺ-ում կառավարության հետ հարց ու պատասխանի ընթացքում պատգամավոր Հեղինե Բիշարյանը բարձրացրեց վթարային հանրակացարանների հարցը. «Ինձ են դիմել Արցախի փողոցի 4-րդ նրբանցքի, 8-րդ հանրակացարանային շենքի բնակիչները: Այդ շենքը չորրորդ կարգի վթարային է, նրանք դիմել են կառավարությանը, քաղաքապետարանին եւ խնդրում են աջակցություն՝ իրենց տարհանելու նպատակով: Կառավարությունը տեղյակ է խնդրից, ուսումնասիրել է, բայց պատասխանել, թե ֆինանսական հնարավորություններ չկան նրանց օգնելու համար: Ինչպե՞ս է լուծվելու այս հարցը»: Պատգամավորի հարցին պատասխանեց քաղաքաշինության նախարար Նարեկ Սարգսյանը՝ նշելով. «Ծանր հարց եք տալիս, ցավոտ խնդիր է, որովհետեւ միայն 20-ից ավելի չորրորդ կարգի վթարային շենքեր կան, որոնց համար 10 միլիարդ դրամ է պահանջվելու՝ չհաշված երրորդ կարգի վթարայինները: Ամենալուրջ կերպով ուսումնասիրել ենք՝ հասկանալու համար, թե ինչ ռեսուրսներ կարող ենք օգտագործել: Ամեն տարբերակ քննարկել ենք, բայց ծայրահեղ ծանր միջոցներով այդ խնդիրը դժվար է լուծել: Հնչել են ԱԺ-ում առաջարկներ, որ սա այն դեպքն է, որ վարկային ծրագրերի հնարավորությունն էլ չպետք է բացառել, գործ ունենք մարդկանց կյանքի կամ անվտանգության հետ: Առաջիկայում քննարկում կլինի վարչապետի մոտ այս հարցով»:
Հետևեք մեզ Viber-ում
