Ով բարևել է ձերբակալում են

«Ես կարծում եմ, որ այս ձերբակալություններն անհեթեթությունների շարքից են, պարզապես երկիրը քայքայելու գործառույթ է իրականացնում իշխանությունը` խարխլելով ամբողջ անվտանգությունը: Իշխանությունների գործողությունները չեմ կարող ադեկվատ համարել»,-Հայելի.am-ի թղթակցի հետ զրույցում, անդրադառնալով Նորք-Մարաշում վնասազերծված զինված խմբավորմանը անդամակցելու և աջակցելու մեղադրանքով հայտնի ձերբակալություններին, ասաց «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը: Գիմիշյանը իրավամբ ահազանգում է, քանի որ, իր խոսքով, երկրի պահպանման հետ կապված լուրջ վտանգներ է տեսնում: «Ես շատ վատ եմ գնահատում իշխանությունների գործողությունները, որոնք խայտառակ պրոցեսներ են սկսել: Ամբողջ ժողովրդին ահաբեկում են: Երկիրը խառնել են իրար, առանց դա էլ ժողովուրդ չի մնացել երկրում: Սա նպաստում է արտագաղթին ու կարծես արտաքին թշնամու պատվերը կատարելիս լինեն: Սա սկսեց Սահմանադրական բերեփոխումների հանրաքվեով, որը երկիրը քանդելուն միտված խայտառակ փաստաթուղթ է, և հիմա էլ այս գործողություններով շարունակություն է ստանում: Ո՞նց կարելի է այս ձևով երկիրը պահել: Սա ինչի՞ է նման»,-հարցադրում արեց ընդդիմադիր քաղաքական գործիչը: «Մեր երկիրը բոլոր առումներով վտանգված է, և մնում է մի բան, որ ժողովուրդը հավաքվի, և մերժելով իշխանությանն էլ, գոյություն ունեցող ընդդիմությանն էլ, ինքն իր ճակատագրին տեր դառնա` պահելով երկիրը: Ժողովուրդը պետք է նպաստի իր անվտանգության համակարգի ստեղծմանը: Այս ձերբակալություններն ինչի՞ են նման: Ով հանդիպել է Արթուր Վարդանյանի հետ` ձերբակալում են: Գուցե հենց իշխանությունների կազմակերպածն է սա: Ոնց որ մեկը գա ինձ բարևի ու հաջորդ օրը ինձ դրա համար ձերբակալեն: Բանը հասել է նրան, որ կուսակցությունների նախագահներին էլ են ձերբակալում»,-մտահոգությունը կիսեց Սոս Գիմիշյանը: Գիմիշյանի խոսքով` ժողովրդի 95 տոկոսն ատում է իշխանություններին.«Բոլորն էլ այս վիճակի համար մեղադրում են գործող իշխանություններին: Բոլորին թող ձերբակալեն: Երկու միլիոն արդեն երկրից գնաց: Հետո՞…»,-հարցադրում արեց Գիմիշյանը: Հիշեցնենք, որ երեկ Հայաստանի Հանրապետության ազգային անվտանգության ծառայության քննչական վարչության վարույթում քննվող թիվ 58216515 քրեական գործով, ՀՀ քրեական դատավարության օրենսգրքի  129-րդ  հոդվածով սահմանված կարգով, 14.01.2016 թ-ին  ձերբակալել են՝ «Հայրենիք և պատիվ» կուսակցության նախագահ Գառնիկ Գևորգի Մարգարյանը և «Եղվարդի մարզակոշիկների ֆաբրիկա» ԲԲ ընկերության հիմնական բաժնետեր Վլադիմիր Փայլակի Առաքելյանը, որոնք կասկածվում են՝ Արթուր Վարդանյանի կողմից ստեղծված հանցավոր համագործակցությանը մասնակցելու,  կազմակերպված խմբի կազմում  զենք և ռազմամթերք իրացնելու, պահելու մեջ,  նախատեսված՝ ՀՀ քրեական օրենսգրքի   223-րդ հոդվածի 2-րդ մասով  և 235-րդ հոդվածի  3-րդ մասով: Լուսնե Ղազարյան