Պատերազմի վտանգն ու մեր հարևանների վախը

Ադրբեջանի հյուսիսում՝ Գաբալայում, տեղի է ունեցել Ադրբեջանի, Վրաստանի և Թուրքիայի պաշտպանության նախարարների չորրորդ հանդիպումը Ադրբեջանի պաշտպանության նախարար Զաքիր Հասանովի հրավերով: Ադրբեջանի և Վրաստանի պաշտպանության նախարարներ Հասանովը և Խիդաշելին նշել են «Ադրբեջանի, Թուրքիայի և Վրաստանի պաշտպանության նախարարների եռակողմ ձևաչափով հանդիպման կարևոր ռազմավարական նշանակությունը»: Այս հանդիպմանը քննարկվել է ղարաբաղյան հակամարտությունը ևս: Լեռնային Ղարաբաղի հակամարտությունը պետք է լուծվի Ադրբեջանի տարածքային ամբողջականության պահպանման և ինքնիշխանության հարգման պարագայում, հայտարարել է Թուրքիայի պաշտպանության նախարար Իսմեթ Յըլմազը. «Ղարաբաղում խաղաղության հասնելու ճանապարհը հայտնի է` հակամարտությունը պետք է լուծվի Ադրբեջանի տարածքային ամբողջականության և ինքնիշխանության պահպանման շրջանակներում»,- ասել է նա` Ադրբեջանի, Թուրքիայի և Վրաստանի պաշտպանության նախարարների եռակողմ հանդիպման արդյունքներով մամլո-ասուլիսի ժամանակ: Նա նաև հայտարարել է, որ Թուրքիան չի աջակցի Ղարաբաղի հակամարտության լուծման այն տարբերակին, որը չի բավարարի այդ պայմաններին: Թբիլիսին նույնպես հանդես է գալիս Ղարաբաղի հակամարտության խաղաղ կարգավորման օգտին: Վրաստանի պաշտպանության նախարար Թինաթին Խիդաշելին նշել է. «Վրաստանը հանդես է գալիս Ղարաբաղի հակամարտության խաղաղ կարգավորման օգտին: Մենք հանդես ենք գալիս տարածաշրջանի խաղաղության, հանգստության և երկարաժամկետ զարգացման օգտին»: Հայաստանի հարևան երեք երկրները հանդես են եկել մի շարք ծրագրերի մասին հայտարարություններով: Ադրբեջանը, Թուրքիան և Վրաստանը պայմանավորվել են միասին ապահովել նավթագազատարների անվտանգությունը, Գաբալայում հայտարարել է Թուրքիայի պաշտպանության նախարար Իսմեթ Յըլմազը. «Երեք երկրների նախարարները քննարկել են անվտանգության հարցը և համաձայնություն են ձեռք բերել դրա շուրջ»: Գաբալայում Ադրբեջանի և Թուրքիայի պաշտպանության նախարարներ Զաքիր Հասանովի և Իսմեթ Յըլմազի հանդիպման ընթացքում քննարկվել են տարածաշրջանային և ռազմական համագործակցությանն առնչվող հարցեր՝ հաղորդում է Ադրբեջանի ՊՆ մամլո ծառայությունը: «Հանդիպման ընթացքում նշվել է, որ Ադրբեջանի և Թուրքիայի ռազմական կապերը կառուցված են եղբայրության և երկու երկրների փոխըմբռնման վրա: Զաքիր Հասանովը և Իսմեթ Յըլմազը քննարկել են տարածաշրջանային և երկկողմ համագործակցությանն առնչվող հարցեր»,- նշվում է հայտարարության մեջ:   Բացի այդ հայտնի է դարձել, որ Ադրբեջանը, Թուրքիան և Վրաստանը կանցկացնեն համատեղ զորավարժություններ: Պաշտպանության նախարար Զաքիր Հասանովը հայտարարել է. «Ադրբեջանի, Թուրքիայի և Վրաստանի ԶՈՒ-երի մարտունակության և մարտական պատրաստականության բարձրացման համար մենք նպատակահարմար ենք համարել համատեղ զորավարժությունների անցկացումը: Ընդգծվել է կիբերանվտանգության ոլորտում սերտ համագործակցության անհրաժեշտությունը, ինչպես նաև գազանավթային խողովակաշարերի պաշտպանությունը: Կարծում եմ՝ դրա համար էլ պետք է անցկացնել համատեղ զորավարժություններ»: Ադրբեջանի, Թուրքիայի և Վրաստանի պաշտպանության նախարարները պայմանավորվել են միասին ապահովել նավթագազատարների անվտանգությունը և բոլորը խոսում են ղարաբաղյան հակամարտության մասին, սա նշանակում է, որ հարևանները չեն բացառում ղարաբաղյան ճակատում բռնկումները: Երեք նախարարները խոսել են ղարաբաղյան խնդրի խաղաղ կարգավորման, խաղաղության հաստատման հնարավորությունների մասին: Սա  ուշագրավ է այն առումով, որ Հայաստանի հարևանները խոսել են այդ մասին Վիեննայում այսօր կայանալիք ղարաբաղյան բանակցություններից մեկ օր առաջ: Այն, որ հարևաններն այսօր խոսում են այդ մասին, նշանակում է, որ արձանագրվում է հնարավոր նոր պատերազմի վտանգի գիտակցումը: Նույնիսկ` Թուրքիայի ու Ադրբեջանի կողմից: Մետաքսյա Շալունց