Երեւանում երիտասարդներին դաժան ծեծի են ենթարկել. նրանք ի վիճակի չեն հաղորդում տալու

Մայիսի 16-ին, ժամը 20.25-ին, հիվանդանոցից ոստիկանության Կենտրոնականի բաժնում հաղորդում է ստացվել, որ «գլխուղեղի սալջարդ, քթոսկրի կոտրվածք» ախտորոշմամբ բուժօգնության է դիմել 20-ամյա Հայկ Պ.-ն եւ հայտնել, որ վնասվածքները ստացել է Տիգրան Մեծի պողոտայում, վիճաբանության ժամանակ: Ոստիկանության մամուլի ծառայությունից NEWS.am-ին հայտնում են, որ նույն օրը, ժամը 21.40-ին, հիվանդանոցից հաղորդում է ստացվել, որ «ծնոտի կոտրվածք» ախտորոշմամբ բուժօգնության է դիմել 19-ամյա Վահե Մ.-ն, ով հայտնել է, որ վնասվածքը ստացել է «Անգլիական» այգում ծեծի ենթարկվելու հետեւանքով: Ժամը 23.40-ին 21-ամյա Արտյոմ Ա.-ն հաղորդում է տվել, որ նույն օրը, ժամը 16-ին, Երեւանի Տիգրան Մեծի պողոտայի թիվ 2 շենքի մոտ, վիճաբանության ժամանակ, անհայտ անձինք ոտքերով եւ ձեռքերով հարվածել են իր մարմնի տարբեր մասերին եւ ծեծի ենթարկել իր ընկերներին` Հայկ Պ.-ին ու Վահե Մ.-ին` պատճառելով վնասվածքներ: Ըստ բժշկի տեղեկանքի` Հայկ Պ.-ն ու Վահե Մ.-ն ի վիճակի չեն եղել հաղորդումներ տալու: Նշանակվել են դատաբժշկական փորձաքննություններ: Կատարվում է հետաքննություն: