Եթե բան ունի ասելու «ա՛յ տղա»-ին, թող կապվի ինձ հետ՝ մամուլով աքլորանալու փոխարեն. Արտակ Բեգլարյանը` Մանվել Գրիգորյանի մամուլի խոսնակին

ԼՂՀ վարչապետի մամուլի խոսնակ Արտակ Բեգլարյանը համացանցի իր էջում անդրադարձել է ԵԿՄ լրատվության բաժնի պատասխանատու Վարդան Վարդանյանի` իրեն ուղղված մեղադրանքներին: Գրառման մեջ ասվում է` «ԵԿՄ լրատվության բաժնի պատասխանատու Վարդան Վարդանյանին էլ խորհուրդ ու կոչ, որ կենացները չխառնի: Նախ՝ Վարդան Վարդանյանը, կարծես թե, լավ չի ծանոթացել «Սպուտնիկ Արմենիա»-ի շեղումներով տեքստին, որտեղ պայմանական միտք եմ արտահայտում: Երկրորդ՝ տվյալ հրապարակմանն արձագանքելուց առաջ լավ կլիներ ինձնից ճշտեր, թե որքանով ճշգրիտ է նյութում ներկայացված իմ խոսքը: Երրորդ՝ ցավում եմ, որ նա իրեն թույլ է տալիս փողոցային ժարգոնով խոսել հարցազրույցում. եթե որևէ սրտանց բան ունի ասելու «ա՛յ տղա»-ին, թող կապվի ինձ հետ՝ մամուլով աքլորանալու փոխարեն: «Ա՛յ տղա»-ն կարող է նաև նրա նախընտրելի լեզվով խոսել, բայց ոչ երբեք հրապարակային ու պաշտոնական տեքստերում»: Նշենք, որ Արտակ Բեգլարյանի նշված գրառումը կապված է այսօր ԵԿՄ լրատվության բաժնի պատասխանատու Վարդան Վարդանյանի` իր մասին արված հայտարարության հետ: Վարդանյանը, մասնավորապես, սուր քննադատության էր արժանացրել ԼՂՀ վարչապետի մամուլի խոսնակ Արտակ Բեգլարյանի հայտարարությունը, ով դատապարտել էր առհասարակ նման երևույթները՝ նշելով, որ յուրաքանչյուրը պարտավոր է կոռեկտ պահել իրեն: