Պատմական քայլ. համաշխարհային արձագանքը

Ատոմային էներգիայի միջազգային գործակալության ղեկավար Յուկիա Ամանոն երեկ ներկայացրել է զեկույց, որում նշվում է, որ Իրանի միջուկային ծրագրերի շուրջ համաձայնագրի գործողությունների համատեղ ծրագրի իրագործման համար բոլոր պայմաններն Իրանը կատարել է: Դրանից անմիջապես հետո պատժամիջոցների չեղարկման մասին հայտարարել էր եվրոպական դիվանագիտության ղեկավար Ֆեդերիկա Մոգերինին, իսկ հետո համապատասխան հրամանագիրն էր ստորագրել ԱՄՆ նախագահ Բարաք Օբաման: ԹԵՐԹ.ամ-ի փոխանցմամբ՝ ТАСС-ը ներկայացրել է տարբեր երկրների ներկայացուցիչների հնչեցրած գնահատականները՝ Իրանի միջուկային ծրագրի շուրջ ձեռք բերված համաձայնագրի կյանքի կոչման և պատժամիջոցների չեղարկման վերաբերյալ: Ռուսաստանի կարծիքով՝ Իրանի դեմ պատժամիջոցների չեղարկումի միակ ճիշտ քայլն էր Բարաք Օբամայի արտաքին քաղաքականության մեջ: ՄԱԿ-ի գլխավոր քարտուղար Բան Կի Մունը ողջունել է, որ ԱԷՄԳ-ի զեկույցից հետո Իրանի միջուկային ծրագրի շուրջ ձեռք բերված համաձայնագիրն ուժի մեջ է մտնում: «Այդ նշանակալի իրադարձությունն ի ցույց է դնում ստանձնած պարտավորություններն իրականացնելու բոլոր կողմերի պատրաստակամությունը»,-ասված է նրա գրասենյակի տարածած հաղորդագրության մեջ: Մեծ Բրիտանիայի արտգործնախարար Ֆիլիպ Համմոնդն իր հերթին ողջունել է Իրանի կողմից ստանձնած պարտավորրությունների կատարումը: «Իրանի միջուկային ծրագրի համաձայնագրի կյանքի կոչումը պատմական քայլ է, որն ամրապնդում է անվտանգնությունն ու բարգավաճումը, և արագացնում է պատժամիջոցների չեղարկումը»,-գրել է Բրիտանիայի ԱԳ նախարարը՝ Twitter-ի իր միկրոբլոգում: Իրանի արտգործնախարար Մոհամմադ Ջավադ Զարիֆն ընդգծել է, որ այդ ծրագրի կյանքի կոչումը բխում է գործարքի բոլոր կողմերի շահերից և ծառայում է տարածաշրջանային ու միջազգային անվտանգության ամրապնդմանը: Ավստրալիայի արտգործնախարար Ջուլի Բիշոպը հաղորդել է, որ իր երկիրը ևս մտադիր է սկսել Իրանի դեմ գործող պատժամիջոցների չեղարկումը: Ավստրալական արտաքին գերատեսչության ղեկավարը ողջունել է ԱԷՄԳ-ի զեկույցը, որը հնարավորություն կտա չեղարկել 2006-2010 թվականներին երկրի ընդունած բոլոր պատժամիջոցները: Ճապոնիայի կառավարությունը ողջունում է Իրանի հետ միջուկային համաձայնագրի կյանքի կոչումն ու մտադիր է աշխատել այդ երկրի հետ «պատմական բարեկամական» հարաբերությունների զարգացման ուղղությամբ. այդ մասին հայտարարել է Ճապոնիայի արտգործնախարար Ֆումիո Կիսիդան: «Ճապոնիայի կառավարությունը ողջունում է այն փաստը, որ  համաձայնագիրը հասել է իրագործման փուլին՝ շնորհիվ կողմերի լարված ջանքերի»,-ասել է նա: Չինաստանի արտգործնախարար Վան Ին ևս ողջունել է համաձայնագրի իրագործումն ու Թեհրանի դեմ եղած պատժամիջոցների չեղարկումը: «Այդ արդյունքին հասնելը հեշտ չէր: Անցյալ տարվա հուլիսին ձեռք բերված համաձայնագրի կյանքի կոչման համար միջազգային միջնորդներն ու Իրանը հսկայական նախապատրաստական աշխատանք են իրականացրել: Նրանք ի ցույց են դրել իրենց քաղաքական կամքն ու համաձայնագրին հավատարմությունը: Չինական կողմն իր հիացմունքն է հայտնում», -հայտարարել է Վան Ին: