ԵԽԽՎ-ը մերժել է ադրբեջանական դատավորների թեկնածությունները

Եվրոպայի Խորհրդի խորհրդարանական վեհաժողովը դարձյալ հետ է ուղարկել դատավորների ցուցակը, որոնք պետք է ներկայացնեն Ադրբեջանը Մարդու իրավունքների եվրոպական դատարանում:Այս մասին, հայտնում է ՄԻԵԴ մամուլի ծառայությունը: Դրա հետ միասին, ՄԻԵԴ-ում Ադրբեջանի մշտական ներկայացուցիչ Չինգիզ Ասքերովը հայտարարել է, որ ներկայում դատավորների թեկնածուների նոր ցուցակ է կազմվում: «Թեկնածուների ընտրությունից հետո ցուցակը դարձյալ կներկայացվի ԵԽԽՎ-ին», -ասել է նա: ՄԻԵԴ-ում Ադրբեջանը ներկայացնող դատավոր Խանլար Հաջիեւի լիազորությունների ժամկետն ավարտվել է 2015 թվականի հոկտեմբերի 31-ին: Ադրբեջանից դատավորի ընտրությունները ՄԻԵԴ-ում պետք է տեղի ունենան ԵԽԽՎ-ի ամառային նստաշրջանում առաջիկա հունիսին: Ադրբեջանը ՄԻԵԴ-ում ներկայացրել էր երկրի սահմանադրական դատարանի 45-ամյա անդամ Ռովշան Իսմայլովի թեկնածությունը, որը աշխատանքի փորձ ունի ԵԽ կառույցներում որպես GRECO (կոռուպցիայի դեմ պայքարի հանձնաժողով), ռասիզմի եւ անհանդուրժողականության  դեմ պայքարի հանձնաժողովում եւ MONEYVA-ում (կեղտոտ փողերի լվացմանը դիմակայության գծով փորձագիտական խումբ): Ռովշան Իսմայլովը երբեք չէր աշխատել իրավապահ մարմիններում եւ ընդհանուր դատարաններում, եւ սահմանադրական դատարանում հայտնվել էր Բաքվի համալսարանի սահմանադրական իրավունքի ամբիոնից: ՄԻԵԴ-ում դատավորների ընտության չափանիշներից մեկը հանդիսանում է որպես մասնագետի թեկնածուի համբավը եւ նրա քաղաքական անկախությունը: Անցյալ տարվա հոկտեմբերին ԵԽԽՎ-ն չի պաշտպանել Ադրբեջանի կողմից ներկայացված երեք թեկնածուներից ոչ մեկին` նախագահի աշխատակազմի մարդու իրավունքների բաժնի տեղակալ, Եվրոպական դատարանում Ադրբեջանի մշտական ներկայացուցիչ Չինգիզ Ասքերովի, Բաքվի վճռաբեկ դատարանի դատավոր Այգյուն Աբդուլլաեւայի եւ Բաքվի թիվ 1 վարչա-տնտեսական դատարանի դատավոր Վուսալի Բախըշովայի թեկնածությունը: