Փաշինյանի իշխանությունը պայթում է․ առաջին ծիծեռնակը

Արդեն հայտնի է, որ Հայաստանի խորհրդարանում ծեծկռտուք է տեղի ունեցել, այն էլ զանգվածային, այս առումով նորանկախ Հայաստանի պառլամենտական կյանքում սա աննախադեպ եւ բացառիկ էր։

Ծեծկռտուքը իշխող ուժի նախահարձակ քայլերով տեղի ունեցավ ճիշտ նույն օրը, երբ երկու տարի առաջ նույն վայրում թավշյա հեղափոխության հաղթանակից հետո Նիկոլ Փաշինյանն ընտրվեց վարչապետ՝ խոստանալով, որ բերում են նոր արժեհամակարգ ու երբեք ու երբեք ՀՀԿ չեն դառնա։ Հեղափոխականներն, իսկապես, չդարձան ՀՀԿ-ական, այլ մի քանի անգամ գերազանցեցին նրանք։ Շմայսի, գեներալ Մանվելի թողած ավանդույթը ոչ միայն շարունակվում է, այլեւ նոր բարձունքներ նվաճում։ Քրեական ենթամշակույթի, բռնության դեմ պայքարող իշխանության ֆրակցիայի պատգամավոր Սասուն Միքայելյանը սկզբում սպառնում է ցխել ամբիոնից ելույթ ունեցող եւ իշխանականներին նախատող Էդմոն Մարուքյանի գլուխը, ապա անցնում ապավինում բռունցքներին։ Այս ամենը տեղի է ունենում հենց ԱԺ նիստերի դահլիճում, հենց Նիկոլ Փաշինյանի ներկայությամբ: Իշխանական թևի որոշ պատգամավորներ էլ կողքերից ու հետևից են հարվածում՝ սրանով ի ցույց դնելով իրենց արժեհամակարգը: Սա թերևս ամենամեծ շնորհավորանքն էր իրենց ղեկավարին, իրականում՝ ամենամեծ անարգանքը։ Եւ այս առումով
էլ լակոտակրատիայի այս էլիտան չունի բարոյական իրավունք համեմատվելու Շմայսի ու նախկինների հետ։Քանի որ նախկինները այսպիսի իրավիճակում արագ փորձում էին հանդարտեցնել կրքերը, իրադարձությունների կիզակետից հեռացնել «հերոսին», իսկ այսօր հեղափոխականները ոչ միայն չզսպեցին իրենց «հրամանատարին» , այլեւ միացան խրախճանքին, որոշներն էլ՝ Արտակ Մանուկյանը, Վահե Ղալումյանը, ով Նիկոլ Փաշինյանի քավորն է, Էդմոն Մարուքյանին թիկունքից էին հարվածում ու փորձում տապալել գետնին։

Երբ իշխանությանը հայտնված անհասկանալի այս խավին տալիս էին «փողոցի խուժան» որակում, թիմի առաջնորդի մակարդակով հիստերիա էր բարձրանում, թե փողոցից ենք եկել, բայց նախկինների պես խուժան ու թալանչի չենք։ Այսօր այս մարդիկ իրենց պահվածքով ցույց տվեցին իրենք իրական դեմքը՝ չհարգելով ոչ իրենց ընտրած հպարտ քաղաքավիներին, ոչ իրենց առաջնորդին, ով ի դեպ, շատ է սիրում տարբեր առիթներով գլուխ գովել, թե մեզ բոլորը հարգում են, հավասարը հավասարի հարաբերություններ են գործընկեր պետությունների հետ,որ ոչ մեկ չի ստորադասում, էլ նախկին բարքերը չկա։ Իրականում պարզվեց, որ նույնիսկ իր թիմում իրեն չեն հարգում։
Վերադառնալով խորհրդարանում տեղի ունեցածի խորքային պատճառներին՝ իշխանությունը ինչ ցանել է, այն էլ հնձում է։ Երբ երկու տարի շարունակ պետության ղեկավարը՝ վարչապետ Փաշինյանը բռնության մթնոլորտ է գեներացնում խոստանում մեկին պատերին ծեփել, մյուսին փռել ասֆալտին, ապա պիտի չզարմանա, որ այսօր իր թիմում անցել են գործնական քայլերի, այո, մարդիկ ղեկավարի պահվածքից այնքան են առիթավորվել ու հաբռքել, որ էլ հաշվի չեն առնում նաեւ իրենց վարչապետի ներկայությունը։ Ինչպես որ սպասվում էր, այս սանձարձակ ու լկտի պահվածքին համարժեք գնահատական էլ չի տրվելու։ Ծեծկռտուքից հետո իշխող ուժը մոտ մեկ ժամ փակ քննարկում է ունեցել, որից հետո Ալեն Սիմոնյանը հայտնել է, թե Մարուքյանը սադրել է, իրենց պատգամավորներն էլ տրվել են սադրանքներին։ Սա նույն Ալեն Սիմոնյանն է, ով երկու օր առաջ հրապարակային խոստանում էր, թե որեւէ խուլիգանություն անպատիժ չի մնալու։ Իշխանությունը պայթում է, եւ այս պարագայում համարժեք գնահատական սպասելն անօգուտ սպասում է․․․

Անի Սահակյան