Արթուր Վանեցյանը կամ «կմերկացնի» Փաշինյանին և բանտ կգնա, կամ էլ...

 Սուրբ Աթոռում ՀՀ նախկին դեսպան Միքայել Մինասյանի ֆեյսբուքյան ուղիղ եթերը խայծի էֆեկտ է ունեցել քաղաքական կայնքում: Մեկնաբանությունները, ինչպես և պետք էր սպասել, տարբեր են, նաև հակասական:

Միքայել Մինասյանը, ինչպես հայտնի է, նախկին նախագահ Սերժ Սարգսյանի փեսան է: Բացի Վատիկանում դեսպանի դիվանագիտական պաշտոնը զբաղեցնելուց` եղել է ՀՀ նախագահի աշխատակազմի ղեկավարի տեղակալը: Չնայած ակտիվ հրապարակային քաղաքական գործունեությամբ չի զբաղվել, սակայն համարվում է նախկին իշխանության գորշ կարդինալը: Ձևավորված հանրային կարծիք կա, որ Միքայել Մինասյանը նախկին իշխանության առանցքային դերակատարն էր, որը լուծում էր ամենակարևոր հարցերը` սկսած իշխանության մեջ կադրային նշանակումներից, վերջացրած բիզնեսի և մեդիա դաշտի հսկիչ մասնաբաժինների տնօրինմամբ: Համենայան դեպս, ինչպես նախկինում, այնպես էլ հեղափոխությունից հետո նման տեղելություները հերքելու ուղղությամբ նկատելի ջանքեր չեն գործադրվել: Կար մտայնություն, որ քաղաքական համակարգի դերաբաշխումները նույնպես ժամանակին Միքայել Մինասյանն էր որոշում, ընդ որում, անգամ իշխանության անմիջական դաշտից դուրս գտնվող հարաբերությունները:

Ժամանակին քաղաքական կուլիսներում անգամ խոսակցություններ էին պտտվում, թե անգամ Ելք դաշինքը, որի ներկաացուցիչներից մեկն էլ այժմյան վարչապետ Նիկոլ Փաշինյանն է, Միքայել Մինասյանի պրոյեկտներից է: Թե Միքայել Միանսյանը ժամանակին ում հետ քաղաքական ինչ հարաբերություն կամ պայմանավորվածություն է ունեցել, այսօր արդեն դժվար է միանշանակ ասել: Ամեն դեպքում, քաղաքական դաշտը Հայաստանում այսօր արդեն զարգացման նոր տրամաբանություն և բոլորովին այլ հրամայական ունի: Միքայել Մինասյանն այժմ հստակ քայլեր է անում` մտնելու ակտիվ և հրապարակային քաղաքական դաշտ` ընդդիմության առանցքային կերպար դառնալու հավակնությամբ: Իտալիայից սկսած նրա ֆեյսբուքյան լայվերը հենց այդ մասին են խոսում:

Վերջին տեսանյութում նա պատմել է 2019 թվականին Հռոմում ԱԱԾ այն ժամանակվա տնօրեն Արթուր Վանեցյանի հետ հանդիպման մասին՝ նշելով, որ նա իրեն Փաշինյանից մեսիջ է փոխանցել: Միքայել Մինասյանը նշել է, որ Վանեցյանի հետ հանդիպման ընթացքում վերջինս Նիկոլ Փաշինյանի անունից իրեն փոխանցել է, որ եթե ինքը որոշակի գումար վճարի, բոլոր քրեական հետապնդումները կդադարեցվեն: «Ես Նիկոլ Փաշինյանին մերժել եմ, որովհետև ինձ չէի կարող ներել և չէի կարող ապրել լավ, երբ իմ ժողովուրդն ու հայրենիքը այս վիճակում է: Ես, ի տարբերություն շատերի, ոչ թե կանխատեսել եմ, ես գրել եմ, ասել եմ, որ մեզ սպասվում է մեծ աղետ: Ես երբեք չեմ կարող պայմանավորվել մարդկանց հետ, ում համարել և համարում եմ պարզապես ստախոս, անպատասխանատու, ժողովրդի դավաճան, և, ցավոք սրտի պետք է ավելացնեմ, պետության թշնամի»,- ասել է Մինասյանը:
Միքայել Մինասյանը փասատացի բարձրացրել է հեղափոխությունից հետո պետական նոր ռեկետի խնդիրը` փող տուր, չփորձես ինձ խանգարել և կունենաս հանգիստ կյանք: Ըստ Միքայել Մինասյանի` հենց այս բանաձևով է իրեն գործարք առաջարկել Նիկոլ Փաշինյանը` Արթուր Վանեցյանի միջոցով: Ստացվում է, որ եթե այսօր Մինասյանը խնդիրներ ունի, նրա նկատմամբ քրեական գործ է հարուցվել կոռուպցիայի մեղադրանքով, պատճառն այն է, որ Փաշինյանի առաջարկած գործարքը չի ընդունել: Օրերս նույն խնդիրն էր բարձրացրել նաև Գալաքսի ընկերության տնօրենը` նախկին ՊԵԿ նախագահ Գագիկ Խաչատրյանի որդին, որի հանդեպ հարւցված գործի շրջանակում արդեն կայացվել է կալանքի որոշում:

Այն, որ հեղափոխությունից հետո Նիկոլ Փաշինյանի իշխանությունը նախկիններից խոշոր գումարներ է պահանջում, կարծես թե գաղտնիք չէ: Փաշինյանն ինքը մի քանի անգամ ասել է, որ կոպեկ առ կոպեկ ետ է բերելու / քյաբաբ առ քյաբաբ, բրդուճ առ բրդուճ/: Սա արվումէ կոռուպցիայի դեմ պայքարի տրամաբանության շրջանակում, սակայն հայտնի չէ, թե ինչպես են որոշում` ումից որքան պահանջել: Ստացվում է նաև, որ նրանք, ովքեր ընդունել են խաղի այս կանոնը, այսինքն` տվել են Փաշինյանի պահանջած գումարը, այսօր որևէ խնդիր չունեն և հանգիստ ապրում են /ականջդ կանչի, Սամվե'լ Ալեքսանյան/: Իսկ նրանք, ովքեր չեն ընդունել կամ չեն համաձայնվել իրենց արված առաջարկին, այսօր կա'մ բանտում են, կա'մ էլ հետախուզման մեջ գտնվելու պատճառով փախել են երկրից:

Վերադառնալով Միքայել Մինասյանին` պետք է նկատել, որ նրա բարձրաձայնումը բավականին անհարմար կացության մեջ է դրել ԱԱԾ նախկին պետ Արթուր Վանեցյանին: Գնդակն այժմ Վանեցյանի դաշտում է: Այս պահին դեռևս դժվար է ասել` Մինասյանը իր ճակատային հայտարարությունը որքանով է համաձայնեցրել ԱԱԾ նախկին պետի հետ: Ամեն դեպքում, Մինասյանը իրեն առաջարկված գործարքի մասին կարող էր խոսել 2019 թվականին, երբ դեռ Վանեցյանը ԱԱԾ ղեկավարն էր: Այժմ Վանեցյանը կարող է պարզապես ասել, որ ինքը պատրաստ չէ վարչապետի հատուկ հանձնարարականը հրապարակել: Կարող է նաև հաստատել Միքայել Մինասյանի ասածը և փակագծեր բացել` հրապարակելով, թե էլ ում է նման գործարքներ առաջարկել Նիկոլ Փաշինյանի անունից: Այդ դեպքում, սակայն, շատ մեծ է հավանականությունը, որ Վանեցյանը կհայտնվի բանտում: Նման նախազգուշական հրապարակային մեսիջներ իշխանության շրջանակներից արդեն կան: Հատկանշական է, որ Նիկոլ Փաշինյանը անգամ խոսնակի միջոցով դեռ չի արձագանքել Միքայել Մինասյանի հայտարարությանը: Թերևս սպասում են Վանեցյանին:

Հայկ Դավթյան