Չինաստանը թուլ չի տալիս ստուգումներ, Թրամփը մեղադրում է՝ «կարող էին դադարեցնել կորոնավիրուսը», իսկ Եվրոպան կկորցնի 2 տրիլիոն եվրո

Սկանդալային տեղեկատվություն է ստացվել Չինաստանից: Այդ երկրի իշխանությունները մերժել են նոր տեսակի կորոնավիրուսի առաջացման շուրջ տարվող հետաքննությանը Առողջապահության համաշխարհային կազմակերպության մասնակցության վերաբերյալ առաջարկները: Այս մասին հայտնեց Չինաստանում ԱՀԿ ղեկավար Գոդեն Գալեային:

Նա ընդգծել է, որ ԱՀԿ-ի համար շատ կարևոր է իմանալ կորոնավիրուսի առաջացման հանգամանքները նոր համաճարակները կանխելու համար: «Մենք գիտենք, որ Չինաստանի ազգային հետաքննությունն արդեն սկսվել է, սակայն այս փուլում մենք հրավիրված չենք դրանում մասնակցելու համար: ԱՀԿ-ն շարունակում է առողջապահության կառույցներին և Չինաստանի իշխանական մարմիններին հարցում ուղարկել»,- ասել է Գալեան բրիտանական Sky News հեռուստաալիքին տված հարցազրույցի ընթացքում: Նա նաև ընդգծել է, որ Չինաստանի իշխանությունները ԱՀԿ-ին հասանելիություն չեն տրամադրել Ուհանում վարակաբանական 2 լաբորատորիաների փաստաթղթերին:

Այսպիսով, Չինաստանն այս մերժմամբ էլ ավելի խորացրեց միջազգային հանրության մոտ կասկածները: ԱՄՆ նախագահ Դոնալդ Թրամփն ասել էր, որ համավարակի պատճառով Չինաստանին պատժելու տարբերակներ են քննարկում: Թրամփը բազմիցս հայտնել է նաև, որ Վաշինգտոնում չեն բացառում այն վարկածը, որ կորոնավիրուսը ստեղծվել է Ուհան քաղաքում գտնվող լաբորատորիայում:

ԱՄՆ նախագահ Դոնալդ Թրամփը հայտնել է, որ Չինաստանը կարող էր կանգնեցնել կորոնավիրուսը, սակայն դա չի արել: Նա Սպիտակ տանը տեղի ունեցած ճեպազրույցում ասել է. «Այն հնարավոր էր կանգնեցնել, չէ որ դա դուրս էր եկել Չինաստանից»: Նրա խոսքով՝ Չինաստանը կամ չի կարողացել կանգնեցնել կորոնավիրուսի տարածումը, կամ չի արել դա: «Մենք առևտրային գործարք ենք կնքել: Սակայն դա այժմ երկրորդական է վիրուսի շուրջ տեղի ունեցողի հետ համեմատությամբ: Այս իրավիճակն անթույլատրելի է»,- հավելել է Թրամփը:

Չինաստանի կեցվածքի հարցում Թրամփը կարևոր էլ իր երկրում նախագահական ընտրությունները: ԱՄՆ նախագահն ասել է՝ կորոնավիրուսի հարցում Չինաստանի կեցվածքը թույլ է տալիս ենթադրել, որ Պեկինն ամեն ինչ կանի նոյեմբերին իր վերընտրությունը խափանելու համար:

Թրամփն ասել է, թե քննարկում է համավարակի հարցում Չինաստանին պատասխանատվության ենթարկելու մի քանի տարբերակ: «Ես շատ բաներ կարող եմ անել», - Սպիտակ տան Օվալաձև աշխատասենյակում ասել է ԱՄՆ ղեկավարը: Նրա համոզմամբ՝ Չինաստանը մեղավոր է կորոնավիրուսի ծագման և տարածման մասին միջազգային հանրությանն ուշացումով տեղեկացնելու, վարակի վտանգավորության աստիճանի, մարդուց մարդուն փոխանցվելու մասին չզգուշացնելու համար: «Չինաստանն ամեն ինչ կանի, որ ես պարտվեմ», - Reuters-ին ասել է Թրամփը: Նա ենթադրում է, որ Չինաստանին ձեռնտու է Դեմոկրատական կուսակցության հավանական թեկնածու, նախկին փոխնախագահ Ջո Բայդենի հաղթանակը, քանի որ, ըստ Թրամփի, դա կթուլացնի առևտրի և այլ հարցերում Վաշինգտոնի կողմից Պեկինի վրա գործադրվող ճնշումը:

Մինչդեռ Չինաստանը հայտարարել է, որ ամերիկյան ընտրություններին միջամտելու մտադրություն երբևէ չի ունեցել: «Մենք հուսով ենք, որ Ամերիկայի ժողովուրդը չի ներքաշի մեր երկիրն ամերիկյան ընտրական գործընթացի մեջ»,- ասել է Չինաստանի ԱԳ նախարարության խոսնակ Ժեն Շուանը:

ԱՄՆ-ն պետք է հասկանա, որ իրենց թշնամին վիրուսն է, այլ ոչ թե Չինաստանը, հայտարարել է Չինաստանի արտգործնախարարության պաշտոնական ներկայացուցիչ Ժեն Շուանը. «Ինչ վերաբերում է պատասխանատվության ենթարկվելուն, ապա մենք բազմիցս ասել ենք, որ վիրուսը ողջ մարդկության համընդհանուր թշնամին է։ Չինաստանը նույնպես տուժող կողմ է, այլ ոչ թե վիրուսի հանցակիցը»: Նա հավելել է, որ առողջապահության ոլորտում համաշխարհային ճգնաժամը հաղթահարելու համար միջազգային հանրությունը պետք է միավորվի և միասնաբար գործի։

Նոր տեսակի կորոնավիրուսով վարակվածների թիվն ամբողջ աշխարհում 3․241․483 է, մահացել է 228․882 մարդ: Առողջապահության համաշխարհային կազմակերպությունը կորոնավիրուսի համավարակ է հայտարարել մարտի 11-ին: Վիրուսը տարածվել է 211 երկրում: Համաճարակի բռնկման մասին Չինաստանի իշխանություններն ԱՀԿ-ին հայտնել են դեկտեմբերի 31-ին:

Նկատենք, որ աշխարհում հայտնաբերված Covid-19-ի դեպքերի ընդհանուր թիվն անցել է 3 միլիոն 300 հազարը, ավելի քան 234 հազար մարդ դարձել է համաճարակի զոհ, բուժվել է շուրջ 1 միլիոն 40 հազարը:

Reuters լրատվական գործակալության փոխանցմամբ՝ Միացյալ Նահանգների վարչակազմը հնարավոր պատասխան քայլեր է մշակում, որոնք կարող է կիրառել Չինաստանի դեմ՝ կորոնավիրուսի համաճարակի պատճառով:

Մեծ Բրիտանիայի վարչապետ Բորիս Ջոնսոնը նշել է, որ երկիրն անցել է կորոնավիրուսի համաճարակի պիկը: Սա Ջոնսոնի առաջին ճեպազրույցն էր COVID-19-ից ապաքինվելուց և աշխատանքի վերադառնալուց հետո: Վարչապետը խոստացել է եկող շաբաթ ներկայացնել կարանտինը թուլացնելու ծրագիր, որի հիմնական նպատակն է վերագործարկել տնտեսությունը, բացել դպրոցները և վերսկսել ընկերությունների աշխատանքը:

Կորոնավիրուսը և կարանտինը հետպատերազմյան շրջանում ամենավատ վիճակի են հասցրել եվրոպական տնտեսությունը: Եվրոստատի վերջին տվյալների համաձայն՝ Եվրամիության տնտեսությունը 2020 թվականի առաջին երեք ամիսներին կրճատվել է 3,5 տոկոսով: Եթե այսպես շարունակվի, ապա տարվա կտրվածքով անկումը կկազմի 13 տոկոս, և Եվրոպան կկորցնի գրեթե 2 տրիլիոն եվրո, նաև նույնքան գումար կծախսի վիրուսի ու ճգնաժամի դեմ պայքարի համար:

Միլիոնավոր աշխատողներ աշխարհում մայիսի 1-ին՝ Աշխատավորների միջազգային օրը սովորաբար մասնակցում էին մեծ երթերի և հավաքների, բայց այս տարի տոնը կզոհաբերվի կորոնավիրուսի տարածումը կանխարգելելու համար: Այս տոնը սովորաբար նշվում է Եվրոպայում, Ռուսաստանում, ասիական մի շարք երկրներում, Հյուսիսային Աֆրիկայում, Կենտրոնական և Հարավային Ամերիկայի մեծ մասում: Անվտանգության նկատառումներով ամբողջ Եվրոպայում հանրահավաքներն ու երթերը չեղյալ են հայտարարվել, Ռուսաստանում ևս շքերթ չի կայանա: Որպեսզի այս կորուստը ինչ-որ կերպ լրացվի, արհմիությունները համախոհներին կոչ են անում իրենց տան պատշգամբներում պաստառներ տեղադրել և գրառումներ անել սոցիալական ցանցերում՝ աշխատավորներին աջակցելու համար:

Մետաքսյա Շալունց