Ատկատ շոու, թե հաղորդում հանցագործության մասին

Վարչապետ Նիկոլ Փաշինյանն ուղիղ եթերի ընթացքում անդրադարձել է Ապրիլի 24-ի՝ իշխանությունների կազմակերպված միջոցառումներին և դրանց հասցեին հնչող քննադատություններին: «Մենք ցույց տվեցինք ազգայինի մեր ընկալումը և, այո՛, հակադրեցինք այդ ընկալումը այն հին ընկալումներին, որոնք ես անվանում եմ ատկատային ընկալումներ, որովհետև ոմանք նաև չեն խորշել թերևս ազգային միջոցառումների տակ որոշակի ատկատներ ապահովել»,- հայտարարել է Փաշինյանը: Թե ինչ եւ ում կողմից է ատկատ թույլ տրվել, երբ, կամ ատկատային ընկալումն ինչ կապ ունի ցեղասպանության միջոցառումների հետ, հայտնի չէ: Փաստ է միայն, որ վարչապետը
հերթական անգամ հանցագործության մասին հաղորդում է տալիս առանց անուններ նշելու:

Եւ ընդհանրապես, հեղափոխությունից երկու տարի անց
ինչպես կարելի է խոսել նախկինների ատկատային ընկալումների մասին, մի պարզ պատճառով,որ մինչ օրս որեւէ բացահայտում չի եղել այդ ուղղությամբ, հանրությանը չի հրամցվել՝ ովքեր ունեն ատկատային ընկալում եւ ինչպես է դա դրսեւորվել:
Հեղափոխությունից հետո կան մի քանի քրեական գործ, որոնց իրավական խարխլության մասին խոսում են մասնագետները եւ վստահեցնում, որ ՄԻԵԴ-ում այդ բոլոր գործերով հօգուտ մեղադրյալների վճիռներ են կայացվելու: Եւ որ, այսօրվա հատընտիր կալանավորվածներից իշխանությունը միայն մեկ՝ թող կորզելու ակնկալիք ունի, չհաշված որոշների դեպքում անձնական վրեժխնդրությունը: Ինչեւէ, թվում էր, թե ցեղասպանության առիթով, որը համազգային համերաշխության, համախմբման խորհուրդ է մշտապես կրել, Նիկոլ Փաշինյանը զերծ կմնար ավելորդ էմոցիաներից, անբռնազբոս հայտարարություններից, բայց ինչպես տեսնում ենք նախկինների նկատմամբ սեւեռուն մտքերը Նիկոլ Փաշինյանին հետապնդում են ամեն վայրկյան, ամեն րոպե անկախ առիթից ու նպատակահարմարությունից:
Ատկատային ընկալումների մասին վերացական դատողությունների փոխարեն ճիշտ կլիներ հետհայացք գցել ու հասկանալ՝ ինչ իրավիճակ է փոխել այդքան թմբկահարված թավշյա հեղափոխությունը եւ աշխարհի ընկալումն այդ համատեքստում ցեղասպանության հարցում: Նույնիսկ ռազմավարական դաշնակիցդ՝ Ռուսաստանը ժլատ գտնվեց հայ ժողովրդին ուղղված ավանդական ուղերձի հարցում, իսկ պատճառն, անշուշտ, հայ-ռուսական անփայլ հարաբերություններն են:
Քանի նոր ուղերձներ պետությունը ստացավ, ինչ քայլեր արվեցին այդ ուղղությամբ, բնականաբար, չկա հեղափոխական առաջընթաց, եթե չասենք, որ այս տարի նույնիսկ դաշնակից պետությունները լռեցին հայությանը պատուհասած անցած դարի առաջին ցեղասպանության մասին: Սա այն պարագայում, երբ 100-ամյա տարելիցի միջոցառումները համաշխարհային լուսաբանման արժանացա, հարյուրավոր պատվիրակներ այդ առթիվ ժամանեցին Հայաստան, էլ չենք խոսում Հռոմի պապի հայտնի պատարագի մասին:
Իսկ ձեզ ներկա ամոթալի իրավիճակը սքողելու համար այլ բան չէր մնում, քան կազմակրպել Արտուշ-պապիկ էժանագին շոուն ու որպեսզի ուշադրությունը շեղվեր այլ ուղղությամբ, որեւէ մեկի մտքով չանցներ հարցնելու՝ եւ ինչ է արել այս իշխանությունը:

Անգամ կորոնովիրուսի համաճարակի այս օրերին իշխանական քարոզչամեքենան զբաղված է նախկինների դեմ արշավով՝ սպառնում են ապօրինի գույքի բռնագանձման օրենքով, քաղաքական հետապնդումները շարունակվում են քրեական գործեր հարուցելու ճանապարհով: Ճգնաժամը թակում է բոլորիս դուռը, կորոնավիրուսի տարածման տեմպը եւ իշխանության անգործությունը սովի առաջ են կանգնեցրել հարյուրավոր ընտանիքների, այնինչ ներսում մեզ հրամցնում են սեփականության լկտի վերաբաշխում, քաղաքական հետապնդումներ ու էժանագին շոուներ։ Իսկ իրենք շարունակում ագահաբար լափել պետական գանձարանը:

Անի Սահակյան