Ռոբերտ Քոչարյանը լուսանկարվելու չէր գնացել...

Հայաստանի երկրորդ նախագահ Ռոբերտ Քոչարյանն առաջիկայում իր գնահատականները կներկայացնի ապրիլյան քառօրյա պատերազմի և դրա հետևանքների վերաբերյալ, այսօր «Ազատության» հետ զրույցում ասաց Հայաստանի երկրորդ նախագահի գրասենյակի ղեկավար Վիկտոր Սողոմոնյանը՝ պատասխանելով հարցին, թե ինչպե՞ս է Ռոբերտ Քոչարյանը գնահատում քառօրյա պատերազմից հետո ստեղծված իրավիճակը, երբ հայկական կողմը կորցրել է մի շարք մարտական դիրքեր և ունի ավելի քան 100 զոհ: «Ընդհանրապես այս օրերի իրադարձություններից, այս իրավիճակից, կարծում եմ, նախագահ Քոչարյանը դեռ առիթ կունենա խոսելու, ինքն իր կարծիքը կարտահայտի այս ամենի վերաբերյալ», - ասաց Սողոմոնյանը։ Նշենք, որ երկու օր առաջ Ռոբերտ Քոչարյանն այցելել էր Ղարաբաղ, որտեղ հանդիպել  էր նախագահ Բակո Սահակյանին: Ղարաբաղի նախագահի պաշտոնական կայքէջի փոխանցմամբ, Քոչարյանն ու Սահակյանը քննարկել էին Ղարաբաղի և Ադրբեջանի սահմանին ապրիլի 2-ից 5-ը տեղի ունեցած պատերազմական գործողություններն ու դրանց հետևանքներին վերաբերող հարցեր: Թե ինչու Քոչարյանի այցի ու հանդիպումների մասին անգամ մեկ լուսանկար չէր հրապարակվել, ինչպես որ դա արվել էր առաջին նախագահ Լևոն Տեր-Պետրոսյանի Ղարաբաղ կատարած այցի ժամանակ, Հայաստանի երկրորդ նախագահի գրասենյակի ղեկավարն ասաց, թե «Ռոբերտ Քոչարյանը լուսանկարվելու համար չէր Լեռնային Ղարաբաղ գնացել։ Նա որևէ մեկին, որևէ բան ապացուցելու խնդիր չունի»: Սողոմոնյանի խոսքով՝ Ղարաբաղ այցելելը, զինվորականների ու Ղարաբաղի ղեկավարության հետ շփվելը Քոչարյանի համար պարբերական բնույթ են կրում: Ինչ վերաբերում է ապրիլի սկզբին պատերազմական գործողությունների օրերին, ապա այդ ժամանակ, ըստ երկրորդ նախագահի գրասենյակի ղեկավարի, Քոչարյանն ամենօրյա հեռախոսազրույցների մեջ է եղել Բակո Սահակյանի հետ: Նշենք, որ վերջին շրջանում Ռոբերտ Քոչարյանի անունը հաճախ է կապվում նախկին արտգործնախարար Վարդան Օսկանյանի նորաստեղծ «Համախմբում» կուսակցության հետ: Վիկտոր Սողոմոնյանը, սակայն, հերքեց այդ ուժի հետ երկրորդ նախագահի կապը: «Ես կարծում եմ՝ զարմանալի չէ, ու նմանատիպ փորձ էլ կա խոսելու, հերքելու, բայց այնուամենայնիվ չհավատալու, ցավոք սրտի, այդ փորձն էլ կա, եթե հիշում եք, «Բարգավաճ Հայաստան» կուսակցության հետ էր կապված այդ փորձը, որ այդ խոսակցություններն առաջին օրվանից մինչև հայտնի իրադարձությունները չէին դադարում, բայց, կարծում եմ, հետո բոլորը համոզվեցին, թե ինչը ինչոց էր», - ասաց Սողոմոնյանը։ «Ազատության» հարցին, թե հնարավո՞ր է, որ առաջիկայում Ռոբերտ Քոչարյանն այնուամենայնիվ համագործակցի նորաստեղծ քաղաքական այդ ուժի հետ՝ հաշվի առելով այն, որ շուրջ մեկ տասնամյակ Օսկանյանն ու Քոչարյանը միասին են աշխատել, Սողոմոնյանը պատասխանեց. - «Որևէ կուսակցության հետ համագործակցությանը պետք է նախ նախորդի Ռոբերտ Քոչարյանի որոշումը՝ ընդգրկվել ակտիվ քաղաքական գործընթացների մեջ, ինչը մինչ օրս չի եղել»։ Նախկին նախագահի գրասենյակի ղեկավարը հիշեցրեց Քոչարյանի հայտարարությունը, որ եթե որոշում կայացնի մտնել ակտիվ քաղաքականություն, ապա ինքն [Ռոբերտ Քոչարյանը] անձամբ կհայտարարի այդ մասին։ «Նման հայտարարություն մենք դեռ չունենք։ Ընդհանրապես նախ պետք է սպասել այդ հայտարարությանը և հետո արդեն տեսնել՝ համագործակցության ինչ հնարավորություններ կան, կամ այդ ներգրավվումը ակտիվ քաղաքականության մեջ իրենից ինչ է ներկայացնում և այլն։ Այնպես որ, եկեք սպասենք», - ասաց Սողոմոնյանը։ Ճշտող հարցին, թե բացառված չէ՞, որ լինի նման հայտարարություն, Սողոմոնյանը պատասխանեց. - «Գիտեք, ձեր խմբագրության մեկ այլ լրագրողին տված հարցազրույցում Քոչարյանն ասել էր՝ «երբեք մի ասա երբեք»։ Հիշեցնենք, «Ազատություն» ռադիոկայանի թղթակից Աննա Սոուսին տված բացառիկ հարցազրույցում Հայաստանի երկրորդ նախագահ Ռոբերտ Քոչարյանը չէր բացառել վերադարձը մեծ քաղաքականություն: «Երբեք մի ասա երբեք»՝ այդ մասին հարցին ի պատասխան ասել էր Քոչարյանը՝ միաժամանակ ընդգծելով, որ ինքը դեռևս չունի որոշում այս հարցի հետ կապված: Աղբյուրը՝ Ազատություն