Քննությունը ցույց կտա` Միհրան Պողոսյանի բիզնեսն օրինական է, թե` ոչ. Արփինե Հովհաննիսյան
Կոռուպցիայի դեմ պայքարը ՀՀ կառավարության պարտականությունն է,լրագրողների հետ զրույցում ասաց ՀՀ արդարադատության նախարար Արփինե Հովհաննիսյանը՝ կոռեկտ չհամարելով մեկնաբանել ՀՀ-ում ԵՄ պատվիրակության ղեկավար Պյոտր Սվիտալսկու այն հայտարարությունը, որ ԵՄ-ն Հայաստանին կոռուպցիայի դեմ պայքարի հարցում չի հատկացնի նախատեսված 15 միլիոն եվրոն, եթե արդյունքներ չտեսնի: Իսկ հարցին, թե առհասարակ կոռուպցիոներն իրավունք ունի՞ զբաղվել կոռուպցիայի դեմ պայքարով, Արփինե Հովհաննիսյանը պատասխանեց. «Եթե դուք կոռուպցիոների մասին խոսում եք իրավապահ մարմինների կողմից հաստատված շրջանակներում և ասում եք՝ ովքեր են կոռուպցիոներներն և ձեր խոսքը ոչ թե ձեր հայտարարությունն է, այլ իրավապահ համակարգի գնահատականը, ապա՝ ոչ»: Անդրադանռալով ԴԱՀԿ այլեւս նախկին պետ Միհրան Պողոսյանի դեմ հարուցված քրեական գործի մասին, նախարարն ասաց, որ կառուպցիայի դեմ պայքարի մասին ոչ միայն խոսվում է, այլ նաեւ քայլեր են ձեռնարկվում, իսկ արդյունքները տեսանելի են: «Ընդամենը օրեր առաջ է գործն ուղարկվել համապատասխան իրավապահ մարմիններին եւ այս պահին ընթանում է նախաքննություն: Եվ պարզապես նաեւ զուտ իրավական տեսանկյունից հարցին արձագանքելով՝ կարող եմ ասել, որ մեղմ ասած քիչ ժամանակ է անցել»,- ասաց Արփինե Հովհաննիսյանը: Իսկ հարցին, թե Միհրան Պողոսյանը 10 տարի առաջ էլ բիզնես ուներ, հիմա էլ ունի, ո՞ւր են արդյունքները, պատասխանեց. «Ես չեմ դրա պատասխանատուն, կամ ես չեմ այն իրավասու մարմինը, որը պետք է գնահատական տա այս պահին՝ այն օրինական է եղել, թե՝ անօրինական: Հատկապես այս պահին, երբ որ նախաքննություն է կատարվում: Խնդիրն այն է, որ համապատասախան հանգամանքների մասին բարձրաձայնվեց և գրվեց մամուլում, ինչը նշանակում է, որ կան համապատասխան առիթներ սկսելու համար որոշակի քննություն: Այն ցույց կտա՝ օրինական է եղել, թե` ոչ, ձեռքբերումն օրինական է եղել, թե` ոչ»:
Հետևեք մեզ Viber-ում
