Վրացի օպերային երգիչը մուտք է գործում քաղաքականություն

 Վրացի հայտնի օպերային երգիչ և «Իավնանա» խոշոր բարեգործական հիմնադրամի հիմնադիր Պաատա Բուրչուլաձեն հայտարարել է, որ կստեղծի «Պետություն ժողովրդի համար» քաղաքական շարժումը և մտադիր է մասնակցել աշնանը կայանալիք խորհրդարանական ընտրություններին: Այս մասին հայտնում է RIA Novosti-ն: Բուրչուլաձեն նշել է, որ իր թիմը մտադիր է անել այն, ինչ չեն կարողացել անել ներկայիս իշխանությունները կառավարման 4 տարում: Նա կողմ է Վրաստանի եվրոպական ինտեգրմանը և մտադիր է «հարստացնել ԵՄ-ն վրացական արժեքներով»: Բուրչուլաձեն կարծում է, որ Վրաստանին բավարար չէ միայն տնտեսապես ուժեղ լինել, այն պետք է օրինակելի երկիր դառնա՝ պահպանելով իր ավանդույթներն ու նպատակները: Նրա խոսքով՝ «Իավնանա» հիմնադրամում աշխատանքի տարիներին ինքը տաղանդավոր և հեռանկարային մարդկանց հավաքելու մասնագետ է դարձել և պատրաստվում է այդ պրակտիկան օգտագործել քաղաքականության մեջ: Երգիչը նաև մտադիր է «վերացնել երկրում կուլիսային կառավարման համակարգը» և ուշադրություն դարձնել Վրաստանի մայրաքաղաքին, մասնավորապես՝ արգելել Թբիլիսիում մշակութային օբյեկտների քանդումը և անպետք ժամանակակից շենքերի ու բնակելի տների կառուցումը: Վրաստանում վերջերս անցկացված սոցհարցման տվյալներով՝ երգիչը դրական արձագանքներ է ստացել երկրի քաղաքացիներից: Վրացական ԶԼՄ-ները չեն բացառում, որ Բուրչուլաձեի թիմը կարող է խորհրդարանական ընտրություններում դառնալ իշխող «Վրացական երազանք» և ընդդիմադիր «Միացյալ ազգային շարժում» կուսակցությունների գլխավոր մրցակիցը: