Հերմինե Նաղդալյանի ամուսինը հայտարարություն է տարածել

Կառավարության շենքի դիմաց բողոքի ակցիա  իրականացնող քաղաքացիները, որոնք պնդում են, թե «Նորաշեն-2007» սպառողական կոոպերատիվի Գեւորգ Չաուշ 14/3 շենքի բնակիչներ են եւ տուժել են Դավիթ Բեգլարյանի ու Հերմինե Նաղդալյանի գործողություններից, ոչ մի կապ չունեն շենքի բնակարանների հետ: Այս մասին այսօր՝ մայիսի 12-ին, իր տարածած հայտարարությունում ասել է Հերմինե Նաղդալյանի ամուսինեը՝ Դավիթ Բեգլարյանը, որն այսօր կառավարության շենքի դիմացից ցուցարարների ձեռքից խլել էր իրենց հետ բերված Հերմինե Նաղդալյանի պատկերով պաստառը: «Ես պնդում եմ, որ բողոքի ակցիայի մասնակիցները ( Արուսյակ Վանյանը, Ավետիք Գալստյանը, Արմեն Մանուչարյանը, Էլմիրա Հակոբյանը, Ծովինար Գրիգորյանը, Վարդգես Տիգրանյանը) որեւէ կապ չունեն Գեւորգ Չաուշի 14/3 շենքի բնակարանների հետ։ Դեռ մեկ շաբաթ առաջ ՀՀ կառավարության շենքի առաջ անձամբ հանդիպել եմ նույն այդ քաղաքացիներին՝ ցանկանալով հասկանալ ստեղծված իրավիճակը եւ քաղաքացիների բողոքի պատճառը: Հանդիպման ժամանակ ցույցի մասնակից քաղաքացիները, որոնց մի մասին ի դեպ ես երբեւէ չէի հանդիպել, նշեցին, որ իրենց պահանջները կապված են այլ մարդկանց հետ: Իրականում ինձ հետ առնչություն չունենալով՝ որոշ անձիք պարզապես ուղղորդված գործողություններ են իրականացնում՝ անհարկի շրջանառելով իմ եւ իմ ընտանիքի անդամների անունները: Ես հայտարարում եմ, որ պատրաստ եմ եւս մեկ անգամ հանդիպել այդ քաղաքացիների հետ, քննարկել իրենց պահանջները, հասկանալ նաեւ նրանց պահվածքի եւ գործողությունների իրական դրդապատճառները»,-ասված է հայտարարության մեջ: Հիշեցնենք, քաղաքացիները, որոնք պնդում են, որ խաբվել են «Նորաշեն 2007» ընկերության կողմից, նշում են, որ 2008թ. իրենք պայմանագիր են կնքել «Նորաշեն 2007» ընկերության հետ` նորակառույց շենքում բնակարաններ գնելու համար, գումարը վճարել են, սակայ  2009թ. իմացել են, որ իրենց  բնակարանները «Նորաշեն 2007» ընկերությունը գրավի տակ է դրել եւ դրանց դիմաց խոշոր պարտքեր վերցրել, ավելի ուշ սնանկ է ճանաչվել եւ իրենց բնակարանները անցել են պարտատերերին, այդ թվում՝ Հերմինե Նաղդալյանի ընտանիքին: «Նորաշեն 2007» սպառողական կոոպորատիվը իր գործունեությունը սկսել է 2007 թ., Երևանում 3 շինություն է կառուցել՝ Գեւորգ Չաուշի 37, Գեւորգ Չաուշի 14/3 եւ Բաբաջանյան 25/1 հասցեներում, որոնք կիսատ են մնացել։