Ինչ մութ գործարք է կայացել. մեղավորը կրկին Քոչարյանն է

Ապրիլի 15-ին ԱԱԾ-ն հաղորդեց, որ մեղադրանք է առաջադրվել Արարատյան հայրապետական թեմի առաջնորդական փոխանորդ Գերշ. Տ. Նավասարդ արքեպիսկոպոս Կճոյանին: Մեղադրանքն առնչվում է հայտնի օֆշորի գործին:
Դեռեւս 2013թ–ին մամուլը գրեց, որ Կճոյանի անունը կապված է օֆշորային գործարքի հետ, որով անցնում էին նաեւ նախկին վարչապետ Տիգրան Սարգսյանը եւ Կճոյանի սանիկ Աշոտ Սուքիասյանը եւ ունեզրկված գործարար Փայլակ Հայրապետյանը: Վերջինս էլ այս երեք անձանց էր տարիներ շարունակ մեղադրում իրեն ունեզրկելու համար:
Սրբազանը, սակայն, հերքել էր մամուլում տարածված լուրերը` նշելով, որ ձեռներեցությամբ զբաղվելու պարագայում երբեք չէր շարունակի ծառայել Հայ Առաքելական եկեղեցուն․ գաղտնի և ընդհատակյա գործունեությունը հարիր չէ իր սկզբունքներին: Եւ, ահա, թավշյա հեղափոխությունից երկու տարի անց, ԱԱԾ-ն նրան գործով մեղադրյալ է ճանաչել:

Որ Կճոյանը հայ առաքելական եկեղեցու օրինակելի եւ պարկեշտ սպասավորներից չէ եւ նրա աշխարհիկ հաճույքների, Բենթլիների ու բոհեմական կյանքի մասին պարբերաբար դրվագներ են հայտնվել մամուլում, թերեւս չի հերքի եւ ոչ մեկը: Բայց այդուհանդերձ նրա նկատմամբ իրականացվող գործընթացը ընկալելի կլիներ, եթե չհաջորդեր վեղափառ Գարեգին Բ-ի՝ Քոչարյանի վերաբերյալ հայտնի հայտարարությանը:

Եւ, իրոք, առնվազն տարակուսելի է, որ հիշյալ քրեական գործով Նավասարդ Կճոյանին որպես մեղադրյալ ներգրավելու մասին հրապարակայնացումը ուղղակիորեն հաջորդում է Ամենայն Հայոց Կաթողիկոսի կողմից կորոնավիրուսի համավարակի պայմաններում խոցելի խմբում գտնվող կալանավորների, այդ թվում և ՀՀ երկրորդ նախագահ Ռոբերտ Քոչարյանի խափանման միջոցի փոփոխման վերաբերյալ դիրքորոշման հանրայնացմանը:
Իշխանությունները գրեթե ամեն օր ապացուցում են, որ իրենց ողջ գործունեությունը պտտվում է մեկ մարդու առանցքի շուրջ եւ այդ մեկ մարդը Ռոբերտ Քոչարյանն է: Ամիսներ առաջ, երբ Արցախի երկու նախագահներ Արկադի Ղուկասյանն ու Բակո Սահակյանը երաշխավորությամբ ներկայացան դատարան, Նիկոլ Փաշինյանն կրկին անկառավարելի ցայտնոտի մեջ էր ընկել ու իրավապահներին, մասնավորապես ԱԱԾ-ին հանձնարարել ընդհուպ ձերբակալել նախագահներին: Սակայն ԱԱԾ այդ ժամանակվա տնօրեն Արթուր Վանեցյանը հրաժարվել է իրականացնել այդ խելահեղ հրահանգը, ինչն էլ նրա հեռանալու պատճառներից մեկն էր:

Հիմա էլ Նիկոլ Փաշինյանը որոշել է Նավասարդ Կճոյանով հաշվեհարդար տեսնել հայ առաքելական եկեղեցու նկատմամբ, որի առաջնորդը հանդգնել է աջակցության խոսք ասել Քոչարյանի վերաբերյալ: Թե ինչպես են այդ գործընթացը գլուխ բերել, կարելի է ենթադրել: Աշոտ Սուքիասյաը, որը կատարվածն ամբողջությամբ իր վրա էր վերցրել եւ դատապարտվել 16 տարվա ազատազրկման, 2020 թվականի հունվարին վեց տարվա ազատազրկումից հետո արդարացվել ու ազատ է արակվել: Հաշվի առնելով գործող իշխանության ձեռագիրը, ամենայն հավանականությամբ գործարք է առաջարկել Սուքիասյանին եւ վերջինս ցուցմունք է տվել իր մյուս գործընկերների դեմ, իշխանությունն էլ այս կոմպրոմատը պահել էր պատեհ պահին հրապարակայնացնելու:

Անի Սահակյան