Սաշիկը գնաց, տեսախցիկները մնացին Նիկոլին

Նիկոլ Փաշինյանը երեկ հիշել էր Սաշիկին և ֆեյսբուքյան իր էջում հրապարակել է տեսանյութ՝ «Հեղափոխությունից առաջ և հետո. Սաշիկի կամերաները» վերնագրով: Տեսանյութում հայտնի կադրերն են, որտեղ դեռևս հեղափոխական օրերի ընդդիմադիր պատգամավոր Նիկոլ Փաշինյանն ու նրա թիմի անդամները փակում էին արագաչափերն ու դրանց ենթադրյալ տիրոջը` Սաշիկին «Сердечний привет» փոխանցում Զիմզիմովից:

Իսկ ի՞նչ փոխվեց արագաչափերի ոլորտում ու վարորդների կյանքում հեղափոխությունից հետո: Հեղափոխությունից հետո տուգանքների համաներում կիրառվեց: Վարորդների մեծ խումբ, ովքեր ժամանակին իրենց տուգանքները չէին վճարել, օգտվեցին առիթից և ջրեցին իրենց տուգանքները: Այդ համաներումը արվեց առանց վերլուծության և առանց որևէ հիմնավորման, առանց սոցիալական բաղադրիչի: Փաստացի պարտաճանաչ քաղաքացիները, որոնք ժամանակին վճարել էին, ոչինչ չստացան, իսկ անպարտաճանաչները շահեցին: Իսկ ինչ եղավ դրանից հետո: Չկա որևէ վիճակագրություն, որը կփաստի, որ վարորդներն այսօր ավելի քիչ են տուգանվում արագաչափերի պատճառով, քան նախկինում էր: Արագաչափերի քանակը չի քչացել, դեռ մի բան էլ ավելացել է, ավելին` տուգանային համակարգից բացի մտցվել է նաև բալային համակարգ: Արագաչափերը նախկինի պես աշխատում են, եթե վարորդը արագութհունը գերազանցում է, պատժվում է: Ընդ որում, եթե նախկինում միայն տուգանք էր վճարում, հիմա նաև զրկվում է բալերից և ընդհուպ կարող է զրկվել վարելու իրավունքից, եթե տարվա համար նախատեսված 9 միավորը սպառվի:
Որոշ տուգանքների չափերը նվազել են, և դա ոչ միայն սարքերին է վերաբերում, այլ մի շարք այլ իրավախախտումների ևս: Բովանդակային առումով, սա նշանակում է, որ եթե նախկինում դու կարող էիր վճարել և անընդհատ խախտում կատարել, ապա այժմ այդ հնարավորությունը չկա, քանի որ ինչ-որ պահից զրկվելու ես վարորդական իրավունքից: Բայց արագաչափեր ունենալու բուն իմաստը կանխարգելող նշանակությունն է: Արագաչափերն իրենց գործառույթն այս իմաստով չեն կատարում ամենևին: Եթե կատարեին, ապա խախտումների թիվը պետք է նվազեր, ինչը տեղի չի ունեցել: Բացի այդ` բալային համակարգի ներդրումը վարորդների շրջանում մեծ դժգոհություն էր առաջացրել, վարորդները դժգոհում էին, որ փողոցների վիճակը վատ է, և շատ դեպքերում խախտումներն անխուսափելի են: Անսարք ճանապարհների պատճառով մեքենաները փչանում են, իսկ դրա համար վարորդը ոչ մի հատուցում չի ստանում, փոխարենը անընդհատ տուգանվում և միավոր է կորցնում:
Ամեն դեպքում, ժամանակին արագաչափերի վրա պաստառներ փակցնող Նիկոլ Փաշինյանը իշխանության գալուց հետո դրանք չվերջացրեց: Ավելին` առ այսօր պարզ չէ, թե ինչ ստացավ պետությունը հանրահայտ Սաշիկից, որը, ըստ այն ժամանակ տարածված կարծիքի, տուգանքների տերն ու տիրակալն էր:
Ով ով, բայց Փաշինյանը շատ լավ է հասկանում, որ Սաշիկի մասին պատմություններում ժողովրդական բանահյուսության բաղադրիչն ավելի մեծ էին, քան իրականությունը: Մենք այդպես էլ չիմացանք, որտեղ են այն հայտնի 50/50 փայամասերը: Նիկոլ Փաշինյանը ժամանակին տեխնոլոգիապես շատ գրագետ օգտագործեց այդ բանահյուսությունը զանգվածներին փողոց դուրս բերելու և հեղափոխութան տանելու համար:
Հիմա, եթե Փաշինյանը նորից հիշել է Սաշիկին, կնշանակի նրա սիրտը նոր հեղափոխություն է ուզում, կնշանակի վիճակն այնքան բարդ է, որ հանրային ուշադրությունը նորից հին ու բարի տեսարաններով շեղելու հրատապ անհրաժեշտություն է առաջացել:

 Հայկ  Դավթյան