Կառավարության հնամաշները. Փաշինյանի նախազգուշացումը
Կորոնովիրուսը Նիկոլ Փաշինյանին զրկել է սեւի ու սպիտակի բաժանումից: Մինչև կորոնավիրուսի հաղթարշավը Փաշինյանը շոուներ էր ապահովում ու ինքնապարգևավճարվում։ Շաբաթներ շարունակ սիրած զբաղմունքից զրկված Փաշինյանը իր համար այսօր նոր թեմա էր գտել Ազգային ժողովում հարցուպատասխանի ժամանակ նախկինների կողմը նորից կրակահերթ ապահովեց…
Հեղափոխությունից հետո պաշտոնյաների պարգևավճարների թափ հավաքած թեման այսօր էլ չի կորցնում իր արդիականությունը: Ստեղծվել է այնպիսի մի իրավիճակ, երբ քայլարածները, որոնք նախկինում հիմնական աշխատանք էլ չունեին, այսօր գրչի մի հարվածով դարձել են Հայաստանի ամենաապահով խավը, իսկ մյուսները մատնված են նախահեղափոխական անտարբերության: ԱԺ ամբիոնից վարչապետ Նիկոլ Փաշինյանը պարգևավճարների խնդրահարույց թեմայի վերաբերյալ հոդաբաշխ և ընկալելի բացատրություններ ներկայացնելու փոխարեն, գործի դրեց մանիպուլացիայի իր ողջ զինանոցն ու փակեց Հայաստանի հպարտ քաղաքացիների բերանները: Ասաց, որ պետական պաշտոնյաների աշխատավարձերի բարձրացումը հեղափոխության ամբիոնից իր տրված խոստումն է և եթե ժողովուրդը դեմ է դրան, ապա պետք է նոր հեղափոխություն անի, քշի իրենց և վերադարձնի նախկիններին՝ ասենք թալանչի Գագիկ Խաչատրյանին եւ Սերժ Սարգսյանին:
Սկսենք վերջից, ամենեւին էլ Փաշինյանի այս հայտարարությունը նախկինների մասով անիրատեսական ու անհավանական չէ, ու եթե իշխանությունը շարունակի այս տեմպերով, ապա կարելի է չկասկածել, որ ժողովրդի մոտ ոչ միայն մեծ ցանկություն է առաջանալու այս մարդկանց վերադարձնել, այլ երանի են տալու հին ու բարի ժամանակներին: Իսկ ընդհանուր առմամբ վարչապետը բազում խոստումներ է տվել, իսկ եթե ինքը մոռացել է, մենք չենք մոռացել:
Օրինակ, խոստացել է ուսուցիչների, բժիշկների, գիտնականների, թոշակառուների, բոլոր-բոլորի հարցում, որ կբարձրացնեն աշխատավարձերը, կապրեն արժանապատիվ կյանքով: Եւ ուրեմն սոցիալական հավասարությունն արդյոք ենթադրում է, որ պետք է նախեւառաջ սկսել սեփական ծառից: Իհարկե, հեղափոխականները կշտապեն ուղղել, թե շատերի աշխատավարձերն ադեն բարձրացրել են, բայց խորհուրդ կտանք չծաղրել մարդկանց, եթե ձեզ թվում է, թե միայն դուք եք արժանի միլիոնանոց աշխատավարձի, իսկ մյուսները պետք է բավարարվեն, լռեն գրոշների դիմաց, ապա չարաչար սխալվում եք:
Փաշինյանը անդրադարձավ նաեւ պետական ապարատի նախին կադրերին նույնպես: Հարցին, թե կառավարությունում հիմնականում հին կադրերն են աշխատում, ինչի համար իրենք պարբերաբար արժանանում են քննադատության, վարչապետը նախ պատասխանեց, թե իսկզբանե խնդիր չի դրել կադրային ջարդի, ապա ավտոմեքենայի օրինակով նախազգուշացրեց նախկիններին, որ իրենք հնամաշ անիվներ են եւ շուտով իրենցից էլ կազատվի, իսկ այդպիսիննեի պակաս չի զգացվում՝ Դավիթ Տոնոյան, Արթուր Դավթյան, Մուկուչյան, Դավիթ Անանյան, Ջանջուղազյան եւ այլք. «Երբ մարդ գումար չի ունենում ավտոմեքենայի 4 անիվն էլ փոխելու, ապա սկզբում փոխում է դիմացի անիվները: Մենք այսօր դեմի անիվները փոխելու պրոցեսի մեջ ենք», ասաց Փաշինյանը:
Մի բան պարզ է, որ Փաշինյանին անգամ այս համաճարակային իրավիճակում ամեն ինչից շատ, ամեն ինչից վեր սեփական շահն է հուզում եւ համավարակի վրա կենտրոնանալու փոխարեն նա պատերազմի նոր դաշտ է մտել նախկինների դեմ:
Անի Սահակյան
Հետևեք մեզ Viber-ում
