Հիտլերի և Մուսոլինիի նման՝ Ալիևն ու Էրդողանն իրար հետ մրցույթ են կպել
Հայաստանի Հանրապետության Ազգային ժողովի փոխնախագահ Էդուարդ Շարմազանովն արձագանքել է ՀՀ ԱԳ փոխնախարար Շավարշ Քոչարյանի հայտարարությանը` ԼՂ հակամարտող բոլոր կողմերին զենք վաճառելու էմբարգոյի վերաբերյալ: «Նա շատ լուրջ քաղաքական գործիչ է, շատ լուրջ քաղաքական ճանապարհ է անցել, այն քիչ մարդկանցից է, ովքեր կոմպլեքս տիրապետում են Ղարաբաղյան խնդրի թե՛ պատճառներին, թե՛ հետևանքներին, ու թե՛ դրանց վերացման ճանապարհներին, հայրենասեր անձնավորություն է, իմ ավագ ընկերն է և շատ հետաքրքիր կարծիք է հայտնել: Հայաստանը խաղաղասեր երկիր է, ենք սպառազինությունների մրցավազքով երբեք էլ հիացած չենք եղել և մշտապես դա քննադատել ենք: Բայց քանի դեռ Ադրբեջանը զինվում է, Հայաստանը պետք է առաջնորդվի «ուզում ես խաղաղություն, պատրաստվիր պատերազմի» փիլիսոփայությամբ»,- նշեց Շարմազանովը: Այնուհետև հայտնեց, որ խոսքը ոչ միայն Ադրբեջանի մասին է, խոսքը նաև Թուրքիայի մասին է. «Դժբախտաբար, մենք ապրում ենք մի տարածաշրջանում, որտեղ ունենք երկու հարևաններ, ու Հիտլերի և Մուսոլինիի նման՝ Ալիևն ու Էրդողանն իրար հետ մրցույթ են կպել, թե ո՞վ է ավելի ֆաշիստ ու նացիստ, ու այս իմաստով՝ մենք պետք է շրջահայաց և ճկուն լինենք»:
Հետևեք մեզ Viber-ում
