Նիկո՛լ, Քոչարյանին բան պատահեց, կփոշմանես, բայց արդեն շատ ուշ կլինի. Գուրգեն Եղիազարյան
Գարեգին Երկրորդ Ամենայն Հայոց Կաթողիկոսը, NEWS.am-ի հարցին ի պատասխան, հայտնել է, որ, մեջբերում եմ՝ «Հաղորդ լինելով Հայաստանի երկրորդ նախագահ Ռոբերտ Քոչարյանի առողջության առնչությամբ բժիշկների մասնագիտական կարծիքներին, կարևոր ենք համարում, որ արդարադատության իրագործման հետ մեկտեղ ձեռնարկվեն բոլոր կանխարգելիչ միջոցներն ու միջոցառումները, այդ թվում՝ խափանման միջոցի փոփոխություն՝ համավարակի այս շրջանում ապահովագրելու նրան առողջական վիճակի հետագա բարդացումներից», մեջբերման ավարտը։
Թեմայի շուրջ զրուցել ենք քաղաքական գործիչ Գուրգեն Եղիազարյանի հետ.
- Ֆրանսիայում այսօր կորոնավիրուսի հետ կապված բանտերից ազատում են նույնիսկ ահաբեկչության համար դատապարտվածներին: Ութ հազար ծանր հանցագործ է աշխարհում ազատվել բանտից: Կալանավայրերը պետք է 60 տոկոսով բեռնաթափվեն: Մարդիկ դատապարտվել են իրենց կատարած հանցանքների համար, բայց չեն դատապարտվել մահվան: Կալանավայրերում կորոնավիրուսի բռնկման արդյունքում մահեր կգրանցվեն և ամբողջ պատասխանատվությունը կընկնի քենախինդների վրա, ովքեր՝ իրենց դիրքն օգտագործում են անձնական վրիժառության նպատակով: Ես մշտապես նշել եմ՝ Վեհափառը մշտապես եղել է իր բարձրության վրա և այս հարցում էլ ինքն իր բարձրության վրա է:
Երեկ էլ վարչապետ Նիկոլ Փաշինյանի մամուլի քարտուղար Մանե Գևորգյանը պատասխանել է «Ազատության» հարցին, թե ինչպե՞ս կմեկնաբանեք Ամենայն Հայոց կաթողիկոս Գարեգին երկրորդի հայտարարությունը, ըստ որի՝ նա կարևոր է համարում Ռոբերտ Քոչարյանի խափանման միջոցի փոփոխությունը, որին ի պատասխան նշել էին. «Նախ հիշեցնենք, որ Մայր Աթոռի տեղեկատվական համակարգի ղեկավար Տեր Վահրամ քահանա Մելիքյանը մինչ այս եղել է Ռոբերտ Քոչարյանի հետ նույն` Մարտի 1-ի գործով անցնող, տարբեր հանցանքների, այդ թվում՝ առանձնապես խոշոր չափերով կաշառք տալուն և փողերի լվացմանն օժանդակելու մեջ մեղադրվող Սամվել Մայրապետյանի անձնական երաշխավորը։ Մայրապետյանը 2019-ի հունվարից բուժման պատրվակով մեկնել է երկրից և չնայած քննչական մարմնի պահանջին և ի հեճուկս Տեր Վահրամ քահանա Մելիքյանի երաշխավորությանը, չի վերադարձել Հայաստան։ ՀՀ կառավարությունը որևէ մեկնաբանություն չունի Վեհափառի ցանկությունների ու հույսերի վերաբերյալ, միևնույն ժամանակ ակնկալում ենք, որ Մայր Այթոռը կվերագնահատի Մայրապետյանի երաշխավորության պատմությունը և դրա հետևանքով առաջացած վիճակը»:
Մեր հարցին՝ ինչպե՞ս կմեկնաբանեք Կառավարության պատասխանը Մայր Աթոռին, Գուրգեն Եղիազարյանը նշել է,
- Կառավարության պատասխանը մեկ անգամ ևս փաստում է, որ մարդիկ առաջնորդվում են միմիայն վրեժխնդրությամբ: Հիշու՞մ եք՝ ինչ-որ մեկը ժամանակին «ճղճղում էր» ՝ վենդետա չի լինելու, իսկ այն ինչ այսօր տեղի է ունենում, ի՞նչ է, եթե ոչ վենդետա:
Մեկ անգամ ևս զգուշացնում եմ՝ Աստված մի արասցե Ռոբերտ Քոչարյանին բան պատահի, ամբողջ պատասխանատվությունը կընկնի մեկ մարդու վրա, և այդ մեկ մարդը՝ Նիկոլն է:
Իր խոսքի վերջում Գուրգեն Եղիազարյանը նշել է՝ Նիկոլը կփոշմանի, բայց արդեն շատ ուշ կլինի:
Հետևեք մեզ Viber-ում
