Եվրոպայում ՀՀՊ-ն կրում է բացառապես պաշտպանական բնույթ

Եվրոպայում Aegis Ashore ՀՀՊ համակարգը կրում է բացառապես պաշտպանական բնույթ՝ հայտարարել է ՆԱՏՕ-ի գլխավոր քարտուղար Յենս Սթոլթենբերգը։ Այս մասին հայտնում է RIA Novosti-ն։ «Արկերը, որոնք մենք կիրառում ենք մոտեցող հրթիռները խոցելու համար, չեն պարունակում պայթուցիկ նյութեր, նրանք պարզապես խոցում են իրենց թիրախները երկնքից։ Այլ կերպ ասած՝ մենք չենք կարողանա կիրառել դրանք հարձակման համար, նույնիսկ եթե ցանկանանք»,- ասվում է Սթոլթենբերգի հայտարարության մեջ, որը հրապարակվել է ՆԱՏՕ-ի կայքում։ «Համակարգը նաև ոչ մի սպառնալիք չի ներկայացնում Ռուսաստանի ռազմավարական միջուկային զսպման համար։ Աշխարհագրությունն ու ֆիզիկան միասին թույլ չեն տալիս ՆԱՏՕ-ի համակարգին խոցել ռուսական միջմայրցամաքային բալիստիկ հրթիռները»,- հավելել է Սթոլթենբեգը։