Հայկական կողմը կարձագանքի ԵԱՀԿ Մինսկի խմբի հայտարարությանը

ԵԱՀԿ Մինսկի խմբի համանախագահների մայիսի 12-ին տարածած հայտարարության մեջ տեղ գտած ձեւակերպումները հայկական կողմին բավարարում են, Aysor.am-ի թղթակցի հետ զրույցում ասաց Հայաստանի ԱԺ փոխխոսնակ Էդուարդ Շարմազանովը: «Այն բառապաշարը, որը առկա է համանախագահների հայտարության մեջ, բավականին դրական է: Դա հիշեցնում է նախագահ Սարգսյանի բառապաշարը: Այն է, որ խնդիրը պետք է լուծել բացառապես խաղաղ ճանապարհով: Քանի դեռ կրակում են, դժվար է խոսել բանակցութունների մասին», - ասաց Է.Շարմազանովը: Նրա խոսքով, շուտով հայկական կողմը հանդես կգա հայտարարությամբ՝ արտահայտելով իր դիրքորոշումը Հայաստանի եւ Ադրբեջանի նախագահների հանդիպման վերաբերյալ: Ավելի վաղ ԵԱՀԿ Մինսկի խմբի համանախագահները հայտարարել են, որ շփման գծի երկանքում եղած վերջին զարգացումնեը հաշվի առնելով՝ ժամանակն է, որ հանդիպում կազմակերպվի Հայաստանի և Ադրբեջանի նախագահների միջև, հայտարարել են «Եղած լարվածությունը նվազեցնելու համար, մենք գտնում ենք, որ Հայաստանի եւ Ադրբեջանի նախագահների հանդիպման ժամանակը եկել է», - նշված է համանախագահների հայտարարությունում: «Մեր արտգործնախարարները աշխատում են, որ հանդիպումը լինի մյուս շաբաթ Վիեննայում: Հանդիպման թեման է լինելու բանակցությունների վերսկսման համար ուղիներ գտնելը», - ասվում է հայտարարության մեջ: «Բանակցություններում հաջողութուններ չեն գրանցվի, եթե բռնությունները շարունակվեն եւ խաղաղություն չի լինի առանց բանակցային գործընթացի. Մենք կրկնում ենք, որ խնդրին ռազմական լուծում չի կարող լինել», - հայտարարել են Մինսկի խմբի համանախագհները մայիսի 12-ին տարածած հաղորդագրության մեջ: