Ոսկու գինն ընկնում է

Հինգշաբթի առք ու վաճառքին ոսկու արժեքը նվազման է անցել ապրիլի վերջից մինչեւ առավելագույն նիշ աճից հետո, որովհետեւ դոլարի փոխարժեքը սկսել է վերականգնել նախկինում կորցրած դիրքերը, վկայում են բորսաների տվյալները: Նյու Յորքի Comex բորսայում ոսկու հունիսյան ֆյուչրսի գինը նվազել է 2,8 դոլարով կամ 0,22 տոկոսով, մինչեւ 1272,7 դոլար տրոյական ունցիայի համար: Արծաթի մայիսյան ֆյուչրսի գինն աճել է 0,15 տոկոսով` մինչեւ 17,35 դոլար մեկ ունցիայի դիմաց, հայտնում է «ՌԻԱ Նովոստին»: Դոլարի ցուցանիշը (դոլարի փոխարժեքը վեց երկրի արժույթների զամբյուղի նկատմամբ, որոնք ԱՄՆ-ի հիմնական առեւտրական գործընկերներն են) բարձրացել է 0,07 տոկոսով, մինչեւ 93,90 կետ: Այս տարի ոսկու գինը 20 տոկոսով աճել է` օգտվելով նրանից, որ ԱՄՆ-ի ԴՊՀ-ն չի շտապում բարձրացնել հիմնական տոկոսադրույքը, ինչը բացասական ազդեցություն է ունենում ազգային արժույթի փոխարժեքի վրա եւ, որպես հետեւանք, նպաստում է թանկարժեք մետաղի արժեքի աճին: Վերլուծաբանները նշում են, որ ամերիկյան կարգավորիչի կողմից մոտակա նիստին տոկոսադրույքի բարձրացման ցածր սպասումները պիտի նպաստեն ոսկու գնի աճին այս եռամսյակի մնացած մասում, գրում է Ռոյթրզ գործակալությունը: «Եթե համաշխարհային տնտեսության աճի սցենարն այնքան լավատեսական չէ, որքան կարծում ենք եւ, ինչն ավելի կարեւոր է, եթե ԴՊՀ-ն չբարձրացնի տոկոսադրույքն այս տարի, ոսկու գինը պիտի աճի մինչեւ 1400 դոլար», — OCBC բանկի վերլուծաբան Բարնաբաս Գանային է մեջբերում Ռոյթրզ գործակալությունը: