Ռուսական բիզնեսի ու քարոզչության հմայքը

Հայաստանի Հանրապետության և Ռուսաստանի Դաշնության զինված ուժերի երկկողմ փոխհամագործակցության շրջանակներում, ՀՀ և ՌԴ պաշտպանության նախարարներ Դավիթ Տոնոյանի և Սերգեյ Շոյգուի միջև ձեռքբերված պայմանավորվածության համաձայն՝ նոր կորոնավիրուսային վարակի տարածման կանխարգելման և հակահամաճարակային միջոցառումների կազմակերպմանն աջակցման, ինչպես նաև փորձն ու պրակտիկ գիտելիքները փոխանցելու նպատակով հենց նոր Հայաստանի Հանրապետություն է ժամանել ՌԴ զինված ուժերի մասնագետների թիմը, երեկ հայտնեց ՊՆ մամուլի քարտուղար Շուշան Ստեփանյանը:

Այն համալրված է COVID-19 վարակի հետազոտություններ կատարելու հնարավորությամբ շարժական լաբորատորիայով և նմուշառման համակարգով։ Պաշտպանության նախարարության տրամադրության տակ այդ համակարգերը հնարավորություն կընձեռեն իրականացնել ՀՀ զինված ուժերի և ՀՀ-ում տեղակայված ՌԴ 102-րդ ռազմաբազայի անձնակազմի հետազոտությունները:

Թիրախային խմբերում իրականացվող հետազոտությունները մեծապես կնպաստեն կանխարգելիչ միջոցառումների կազմակերպմանն ու զգալիորեն կբարձրացնեն հակահամաճարակային միջոցառումների արդյունավետությունը:

ՊՆ մամուլի քարտուղարը հայտնել է, որ մասնագետներն աշխատանքները կսկսեն հայկական Զինված ուժերի ստորաբաժանումներից: «Գյումրիում տեղակայված ռուսական 102-րդ ռազմաբազան հերթի մեջ է: Այս պահին խորհրդակցություն է ընթանում: Առաջինը, հավանաբար, նմուշառում կիրականացվի այն զինծառայողներից, որոնց մոտ կորոնավիրուսն արդեն իսկ հաստատված է: Կրկնակի թեստեր կարվեն՝ պարզելու՝ արդյոք վերջիններս առողջացել են»:

Ռուսաստանի կողմից Հայաստանին աջակցելը, իհարկե, դրական քայլ է: Սակայն Ռուսաստանը, որտեղ համավարակի տարածումը պակաս թափով չի ընթանում՝ կարծես, փոքր-ինչ անցել է համաճարակային աջակցության քարոզչության իրականացման: Սեփական երկրում հասարակությունը դժգոհում է, որ տարական՝ բժշկական դիմակներ ու ձեռնոցներ չեն կարողանում հայթայթել, իսկ քաղաքներում, գյուղերում ախտահանում չի իրականացվում, իսկ Պուտինը ցուցադրական օգնություն է ուղարկում այլ երկրներ:
Հիշեցնենք, նախ՝ Իտալիան նման հումանիտար օգնություն ստացավ, որից հետո իտալական մամուլը գրեց, որ ռուսական ապրանքների մեծ մասը ոչ պիտանի էին, ապա Միացյալ Նահանգներ ուղարկված օգնության առիթով՝ հրապարակվեցին տեղեկություններ, թե դրանք պարզապես վաճառվել են Միացյալ Նահանգներին:

«Ամերիկայի ձայնն» անդրադարձել է թեմային, թե ինչու Ռուսաստանն աջակցեց Միացյալ Նահանգներին: Մարտի 31-ին ռուսական ռազմական մի օդանավ 60 տոննա կշռով բժշկական սարքավորումներ հասցրեց Միացյալ Նահանգներ: Այն վայրէջք կատարեց կորոնավիրուսի էպիկենտրոն դարձած Նյու Յորքում: Ինչպես Կրեմլի խոսնակ Դմիտրի Պեսկովն է ասել, ԱՄՆ-ի նախագահն ուրախությամբ է ընդունել մարդասիրական այս օգնությունը:

Սակայն ինչպես ԱՄՆ-ի Պետդեպարտամենտը հայտարարեց, սարքավորումների ու մյուս մատակարարումների համար ԱՄՆ-ը վճարել է ամբողջությամբ: Ինչպես արտաքին գերատեսչության կայքում է ասված, ԱՄՆ-ը համաձայնվել է գնել բժշկական պարագաները, այդ թվում` շնչառությանը նպաստող սարքավորումները, երկու երկրների նախագահների միջև նախորդ օրն անցկացված հեռախոսազրույցի արդյունքում:
Ռուսաստանի արտգործնախարարությունն ավելի ուշ հայտարարել է, թե մատակարարումների կեսի համար վճարել է ռուսական կողմը, մյուս կեսի համար` ԱՄՆ-ը: Նույն օրը ԱՄՆ-ի Պետդեպարտամենտը նորից է հանդես եկել հայտարարությամբ: Այս անգամ այն մասին, որ Վաշինգտոնն է վճարել ամբողջ բեռնափոխադրման համար, սակայն իջեցված գներով:

Ինչպես վերլուծաբան Հեդըր Քոնլին է նկատել, նման աղետների ժամանակ տարբեր պետություններ, որոնք հանդես են գալիս բարի կամքի դրսևորմամբ, ունենում են բարի մթնոլորտ հաստատելու նպատակ: Սակայն Կրեմլն իր այս քայլը կարող է ծառայեցնել այն տպավորությունը ստեղծելու համար, որ Միացյալ Նահանգներն ի վիճակի չէ հարթելու այս ճգնաժամը»:

Իսկ մեկ այլ վերլուծաբան` Մայքըլ Քարփենթերի խոսքերով, ռուսական առաքումներն ունեցել են պրոպագանդիստական նպատակ, ցույց տալու համար, որ այդ սարքավորումներն ավելի են անհրաժեշտ ԱՄՆ-ին, քան Ռուսաստանին:
Բացի այդ, ինչ վերաբերում է բժշկական սարքավորումներ առաքելու որոշման նկատմամբ ռուսների կարծիքին, ապա պետք է ասել, որ այստեղ այդ որոշումը համարում են հապշտապ, երբ կորոնավիրուսը սկսել է արագությունը գերազանցել Ռուսաստանում:

Մետաքսյա Շալունց