Ով այնպիսի սուտ ասի, որ ես ասեմ` սուտ է, պրեմյայիս կեսը կտամ նրան

Ֆեյսբուքյան հարցուպատասխանի ընթացքում վարչապետ Նիկոլ Փաշինյանը
հայտարարեց, որ բարձրաստիճան պաշտոնյաներին տրվող տարեկան պարգևավճարը ընդամենը 1 միլիարդ դրամ է կազմում, որը եթե բաժանելու լինեին բոլոր թոշակառուներին,

ապա տարեկան կտրվածքով յուրաքանչյուրին կհասներ ընդամենը 1988 դրամ գումար, իսկ մեկ ամսվա համար 150 դրամի կարգի ծիծաղելի մի թիվ: Ու դրանից հետո Փաշինյանը ինքն իրեն գովաբանել է, թե թոշակները 3000-5000 դրամով բարձրացվել են, ինչը հնարավոր է դարձել վերը նշված պաշտոնյաների լավ աշխատանքի արդյունքով: Ասել կուզի` ավելի լավ է թոշակառուն ամսվա կտրվածքով 165 դրամ պակաս ստանա, փոխարենը մենք ունենանք նորմալ վարձատրվող և կոռուպցիայով չզբաղվող պաշտոնայներ, որոնց աշխատանքի շնորհիվ հետագա տարիներին ևս կարողանալու ենք թոշակ բարձրացնել:
Այն, որ պաշտոնյան, հատկապես բարձրաստիճան պաշտոնյան պետք է պատշաճ վարձատրվի, միանգամայն ընդունելի է: Բայց երբ այս մասին խոսող վարչապետը միանգամայն սուտ թվեր է ներկայացնում հանրությանը` թաքցնելով պարգևավճարների իրական չափը և ներկայացնելով բազմակի անգամ ավելի փոքր պարգևատրման թիվ, քան կա իրականում, սա նշանակում է գործ ունենալ պարզ խաբեբայության հետ: Դժվար է ասել, թե Նիկոլ Փաշինյանը որտեղից է վերցրել այս 1 մլրդ դրամ թիվը, բայց ինչպես կասեր դասականը` ասելը քիչ է, փաստերն ավելի զորավոր են:

Պետական տարբեր մարմիններում պարգևատրումների չափի վերաբերյալ լրատվամիջոցները տարբեր պաշտոնական պատասխաններ են հրապարակել: Ըստ այդմ` ՀՀ պետական եկամուտների կոմիտեում 2019 թվականի պարգևավճարները կազմել են 5 մլրդ 598,360,000 դրամ, որը համարժեք է մոտ 11,8 միլիոն դոլարի։ Այս տեղեկատվությունը տրամադրել են ՊԵԿ-ից` Թերթ.ամ-ի հարցմանն ի պատասխան: Պետական եկամուտների կոմիտեի ղեկավար Դավիթ Անանյանի, նրա տեղակալների, օգնականների, քարտուղարուհու և ՊԵԿ այլ պաշտոնյաների պարգևավճարների ֆանտաստիկ չափի մասին ևս հրապարակումներ եղել են, որոնց մասին լրացուցիչ հիշատակելը թերևս ավելորդ գլխացավանք է: 

Yerkir.am-ի հարցմանն ի պատասխան` Երևանի քաղաքապետարանից հայտնել են, որ քաղաքապետարանի աշխատակիցների պարգևավճարների ընդհանուր թիվը 14 ամսվա համար կազմել է 2 մլրդ 102.213.050 ՀՀ դրամ (շուրջ 4.400.000 $)։ Այսինքն` ամսական քաղաքապետարանի աշխատակազմին և Երևանի վարչական շրջանների աշխատակազմերի աշխատակիցներին վճարվել է ավելի քան 150 մլն. դրամ կամ շուրջ 315 հազար դոլար պարգևավճար։ Լրատվամիջոցները նաև հրապարակել են, որ վարչապետի աշխատակազմի պարգևատրման չափը 2019 թվականին կազմել է 1 մլրդ դրամ, իսկ ԱԺ պարգևատրումը կազմել է 2 մլրդ դրամ: Չհաշված տարբեր նախարարությունների, մարզպետարանների, կոմիտեների և այլ կառույցների պարգևատրումները: Պարզագույն թվաբանությունը ցույց է տալիս, որ Նիկոլ Փաշինյանի հրապարակած 1 մլրդ դրամ թիվը պարզունակ սուտ էր` հանրությանը մոլորության մատնելու նպատակով:
«Ընդհանուր առմամբ, ուզում եմ ընդգծել՝ թե ինչ-ինչ հարց ենք լուծել բարձրաստիճան պաշտոնյաների պարգևավճարների հարցը լուծելով: Մենք կարողացել ենք 2019թ. ընթացքում աննախադեպ բարձր տնտեսական ցուցանիշներ ապահովել, որի արդյունքներով մենք մեկ միլիոն իննսուն հազար մարդու աշխատավարձ, թոշակ, նպաստ բարձրացրել ենք: Հասկանում եմ, որ պարգևավճարների թեման շահարկումների տեղիք է տալիս, բայց ես մի պարզ թվաբանական գործողությամբ ցույց տվեցի, թե այդ շահարկման հետևում ինչ կա»,- հայտարարել է Փաշինյանը:

Վերը հիշատակված թվերն արդեն իսկ ցույց են տալիս, թե ինչ է փաստում թվաբանությունը. ներկայացված թվերի գումարն մոտ 10 մլրդ դրամ է: Եթե սրան էլ ավելացնենք տարբեր նախարարությունների և պետական այլ գերատոսչությունների աշխատակիցներին տրված պարգևավճարները, գումարը միգուցե տասնապատկվի:

Մի տեսակ անհարմար է, երբ երկրի ղեկավարի խոսքերը հայտնի հեքիաթի թագավորի ասածն են հիշեցնում. «Ով այնպիսի սուտ ասի, որ ես ասեմ` սուտ է...»:

 
Հայկ Դավթյան