Բատկան գիտի, թե կորոնավիրուսից ով ինչ է կորցնելու

Բելառուսում կորոնավիրուսից մահացել է չորրորդ հիվանդը: Իսկ Բելառուսի առողջապահության նախարարությունը ապրիլի 2-ին հայտնել է, որ երկրում գրանցվել է կորոնավիրուսի 304 դեպք, մահացածները քրոնիկ այլ հիվանդություններ ունեցող տարեցներ են:

Բայց այս փաստերը նախագահ Ալեքսանդր Լուկաշենկոյին բավարար չեն թվում, որ նա արգելափակում մտցնի երկրի տնեսության մեջ կամ հանրային կյանքի մնացած ոլորտներում: Ավելին` Լուկաշենկոն շարունակում է պնդել, որ կորոնավիրուսի հետևանքով աշխարհի մի շարք երկրներում տեղի ունեցող տնտեսության փլուզումը համաշխարհային փսիխոզ է: Բելառուսն առայժմ բաց է պահում սահմանները, երկրի ներսում տեղաշարժի և հանրային միջոցառումների հետ կապված արգելքներ չկան, չի պատրաստվում նաև տնտեսական արգելքներ կիրառել:
«Շատ մարդիկ են հայտնվել (դե, գուցե Բելառուսում այնքան էլ շատ չեն, վարչակազմի ղեկավարն ու պետքարտուղարը դրանով են զբաղվում), ովքեր փորձում են հռչակվել այս թեմայով ինտերնետում։ Մենք սկսեցինք բռնել նրանց եւ հարցնել։ Գիտեք փսիխոզը այնքա՞ն էլ բավարար չէ, պետք է ինչ-որ տեղ տաքացնե՞լ, ցո՞ւյց տալ։ Իսկ այսպես կոչված ընդդիմությունը փորձում է դա օգտագործել իշխանության դեմ։ Ես լռում եմ՝ ժամանակն է մեզ դատելու»,- հայտարարել Է Լուկաշենկոն։
Հերթական աղմկահարույց հայտարարության մեջ Բելառուսի նախագահ Ալեքսանդր Լուկաշենկոն նորից պնդել է, որ աշխարհի գերտերությունները կորոնավիրուսի բռնկմամբ պայմանավորված համաշխարհային ճգնաժամը կարող են օգտագործել սեփական նպատակների համար: «Երբ կորոնավիրուսը վերջանա (ոչ թե վիրուսը, այլ փսիխոզը), ես ձեզ շատ հետաքրքիր բաներ կպատմեմ: Շատ։ Իսկ դուք մինչ այդ սկսեք երկու հարցի մասին մտածել։ Առաջին հարցը ' կորոնավիրուսը ձեռքո՞վ ստեղծված վարակ է, թե՞ պատահաբար օդից հայտնվեց։ Ո՞ւմ էր այն պետք։ Երկրորդ հարցը․ դեռ չենք պատասխանի այս հարցին, բայց ասեք՝ աշխարհում, սկսած իմ գործընկերներից, քաղաքական գործիչներից, վերջացրած մյուսներով փորձեցի՞ն իրենց նպատակների եւ շահերի համար օգտագործել այդ վիրուսային հիվանդությունը կամ փսիխոզը։ Ահա երկու հարցի շուրջ մտածեք. ում է պետք եւ ինչպե՞ս են օգտվել։ Ինչ-որ մեկը հայտարարել է, որ դա պատերազմ է, պետք է «դեղին բաճկոններին» վերադարձնել փողոցներ, ինչ-որ բան շրջել։ Ինչ-որ մեկը ընտրություններ ունի, ինչ-որ մեկը՝ ուրիշ բան ունի։ Եվ բոլորը սկսում են խաղարկել, պտտել։ Կրակի հետ կատակում են։ Բայց այդ թեմայով մենք ձեզ հետ կխոսենք հետո։ Իսկ չի՞ թվում, որ աշխարհի ուժեղները առանց պատերազմի այդ, այսպես կոչված, կորոնավիրուսի փսիխոզի միջոցով ցանկանում են բաժանել աշխարհը»,- ասել է նա և պնդել, որ տեղի է ունենում տնտեսական պատերազմ:

Լուկաշենկոն հայտարարել է, որ ինքն անհանգստացած է հատկապես Ռուսաստանի համար, որը փակել է սահմանները, ոչ աշխատանքային օրեր հայտարարել, կարանտինային սահմանափակումներ մտցրել: Բոլոր վիճակագրական տվյալները փաստում են, որ գրիպային վիրուսներից աշխարհում ավելի շատ մահվան դեպքեր են լինում, քան կորոնավիրուսից: Չկան գիտական ապացույցներ, որոնք փաստում են, որ այս վիրուսն ավելի վտանգավոր է, քան օրինակ գրիպի H1N1 վիրուսը, որը մի քանի տարի առաջ շատ տարածված էր: Չկան մասնագիտական հստակ գնահատականներ, թե ինչ հետևանք է թողնում այս վիրուսը վարակված ու առողջացած մարդու վրա: Փոխարենը կա ենթագիտակցության վերաճած համընդհանուր մոտեցում, թե կորոնավիրուսը համաշխարհային մի աղետ է, որի դեմն առնելու համար պետք է նստել տանը: Պետք է նստել տանը, եթե անգամ վարկաված չես, առողջական խնդիր չունես, վտանգ չես ներկայացնում, վարակ չես տարածում: Իրավունք չունես փողոց դուրս գալ, աշխատանքի գնալ, ընտանիքիդ նմաների հետ նստել քո սեփական մեքնենայի մեջ, այցելել հարազատներիդ: Ոչ բոլոր աշխատանքներն են, որ կարելի է տանը նստած` հեռավար կատարել: Տնտեսությունը փլուզվում է ամենուր: Համաշխարհային տնտեսության կառուցվածքն արդեն փլուզված է, և բոլոր փաստերը խոսում են այն մասին, որ համավարակի տնտեսական հետևանքն ավելի մեծ է, քան առողջապահականը: Ինչու H1N1 վիրուսի տարածման ժամանակ, երբ համաճարակային իրավիճակը նույն էր, նման տնտեսական սահմանափակումներ չկիրառվեցին: Ոչ ոք այս հարցի պատասխանը չի տվել:
Վիրուսի վերացումից հետո թերևս ժամանակ է պետք` վերլուծելու արդյունքներն ու կատարվածի հետևանքը` հասկանալու` ով ինչ շահեց, ով ինչ կորցրեց:
Բելառուսի նախագահի ակնարկները, թե ինքը հետաքրքիր բաներ ունի պատմելու, նորից և կրկին մտածելու տեղիք են տալիս: Մարդկությունը տանը մնալով մասնակցում է տնտեսական գլոբալ պատերազմին: Մեզանից յուրաքանչյուրը տանը նստած անգամ տեղյակ չէ, թե որ երկրի կամ կենտրոնի ինքնամեկուսացված զինվորն է ինքը:

Ամեն դեպքում, Բատկան գիտի մի բան, որը մենք կիմանանք տևական ժամանակ անց, երբ արդեն ապրելիս կլինենք հզորների կազմաքանդած ուրիշ աշխարհում:

 Հայկ  Դավթյան