Ստացվում է միայն «ախպերության» ֆոնի ցուցադրություն

Արդեն գրեթե երկու տարի է, ինչ Նիկոլ Փաշինյանը փորձում է ցույց լավ, որ գործընկերների հետ ունի լավ հարաբերություններ: Վրաստանն այս առումով, առանձնահատուկ դիրքում է: Վրաստանում արդեն երկու տարվա ընթացքում 3-րդ վարչապետը փոխվեց: Փաշինյանը հարևան երկրի հետ հարաբերությունների առումով, անում է ամեն ինչ, որպեսզի հայ-վրացական հարաբերությունները երևան խիստ բարեկամական:

Իհարկե, Վրաստանը, որպես տարածքային խնդիր ունեցող երկիր՝ ունի իր շահերը: Թբիլիսին Լեռնային Ղարաբաղի հարցով ունեցել է իր հայտնի դիրքորոշումը՝ պարզաբանելով, որ դա պայմանավորված է նրանով, որ իրենք էլ տարածքային խնդիր ունեն և չեն կարող ճանաչել Լեռնային Ղարաբաղը:

Սակայն խնդիրը նրանում է, որ Հայաստանի իշխանությունները հարևան և բարեկամ երկրի հետ այնպիսի աշխատանք չեն տանում, որ այդ դիրքորոշումը այդպես ցցուն չարտահայտվի:

Ահա, երեկ Վրաստանը հայտարարեց, որ չի ճանաչում Լեռնային Ղարաբաղի «այսպես կոչված» նախագահական և խորհրդարանական ընտրությունները, հայտարարել է երկրի արտաքին գործերի նախարարությունը:

«Վրաստանի արտաքին գործերի նախարարությունը վերահաստատում է իր աջակցությունը Ադրբեջանի ինքնիշխանությանը և տարածքային ամբողջականությանը և չի ճանաչում այսպես կոչված խորհրդարանական և նախագահական ընտրությունները, որ Լեռնային Ղարաբաղում անցկացվեցին մարտի 31-ին: Վրաստանն աջակցում է ղարաբաղյան հակամարտություն միայն խաղաղ ճանապարհով կարգավորմանը՝ հաշվի առնելով միջազգայնորեն ճանաչված իրավունքի նորմերն ու սկզբունքները», - ասվում էր Վրաստանի ԱԳՆ-ի այսօրվա հայտարարությունում:

Բացի Վրաստանի, մեկ այլ երկիր, որի ղեկավարի հետ Փաշինյանը ցույց է տալիս, որ ունի ընկերական հարաբերություններ, Կանադան է: Կանադան աջակցում է Ադրբեջանի տարածքային ամբողջականությունը և չի ճանաչում Lեռնային Ղարաբաղի ընտրությունները։ Այս մասին գրառում է արվել Թուրքիայում Կանադայի դեսպանության թվիթերյան պաշտոնական էջում։ «Կանադան աջակցում է Ադրբեջանի տարածքային ամբողջականությունը և չի ճանաչում այսպես կոչված «ընտրությունները», որոնք տեղի են ունեցել Լեռնային Ղարաբաղում մարտի 31-ին։ Այդպիսի «ընտրությունները» վտանգում են այդ թվում ԵԱՀԿ Մինսկի խմբի ջանքերը` հասնելու Լեռնային Ղարաբաղի հակամարտության խաղաղ կարգավորման»,- ասված է գրառման մեջ։

Հիշո՞ւմ եք, թե Կանադայի վարչապետ Ջասթին Թրյուդոյի երևանյան այցը ինչպես էր Փաշինյանը որպես «լավ ընկերոջ» հարաբերություն ներկայացնում՝ էլ երգ ու պար, էլ հայկական դրոշի գույներով գուլպաների փորձարկում՝ տեսախցիկների առջև:
Նույնն էլ՝ Վրաստանի վարչապետ Գիորգի Գախարիայի դեպքում էր: Փաշինյանի՝ Վրաստան կատարած վերջին այցի ժամանակ Վրաստանի վարչապետը նույնիսկ շնիկ նվիրեց Փաշինյանին, համատեղ սելֆիով ցուցադրում էին հայ-վրացական բարեկամությունը՝ հայերեն և վրացերեն երգերի կատարմամբ:

Այսինքն՝ Փաշինյանը երկրների հետ բարեկամական հարաբերությունների համար կարծես ապահովում է միայն ֆոնային մթնոլորտը: Սակայն իրականում, գործընկեր պետությունների հետ չի տարվում խորքային դիվանագիտական աշխատանք:

Մետաքսյա Շալունց