Փաշինյանն ընտրեց Պուտինից հրապարակային դժգոհելու տարբերակը

Հայկական կողմի նախաձեռնությամբ Բելառուսի նախագահի և Հայաստանի վարչապետի միջև այսօր տեղի է ունեցել հեռախոսազրույց: Այս մասին БЕЛТА-ին հայտնել են Բելառուսի ղեկավարի մամուլի ծառայությունից:

Ալեքսանդր Լուկաշենկոն և Նիկոլ Փաշինյանը քննարկել են տնտեսության գործունեությունը ներկայիս ծանր պայմաններում՝ նշելով առկա լուրջ խնդիրներն ու դժվարությունները:

Կողմերը կարծիքներ են փոխանակել ածխաջրածինների գների վերաբերյալ, որոնք Բելառուսն ու Հայաստանը ներմուծում են Ռուսաստանից: Ալեքսանդր Լուկաշենկոն և Նիկոլ Փաշինյանն արձանագրել են բնական գազի գնի բարձր մակարդակը, նշելով, որ այն ակնհայտորեն չի համապատասխանում համաշխարհային մակարդակին և, ընդհանուր առմամբ ստեղծված իրավիճակին:

Քննարկման առանձին թեմա էր առողջապահական համակարգերի գործունեությունը և սեզոնային սուր վիրուսային վարակների տարածման հակազդումը:

Նաև ներկայիս իրավիճակի կապակցությամբ Բելառուսի նախագահը և ՀՀ Վարչապետը քննարկել են ԵԱՏՄ ղեկավարների հանդիպման հնարավորությունը՝ տնտեսական զարգացող մարտահրավերները քննարկելու համար: Նման հանդիպում անցկացնելու նախաձեռնությունով հանդես է եկել Ալեքսանդր Լուկաշենկոն՝ որպես Եվրասիական տնտեսական միությունում նախագահող երկրի ղեկավար: Բելառուսի առաջնորդն ընդգծել է հրատապ հարցերի առկայությունը, որոնք պահանջում են մանրամասն քննարկում ամենաբարձր մակարդակով:

Բելառուսի ղեկավարը հանձնարարել է ԵՏՀ Խորհրդի նախագահ Միխայիլ Մյասնիկովիչին՝ յուրաքանչյուր կողմի հետ մշակել այդ հարցը և նրանց հասցնել քննարկված դիրքորոշումները: Եթե պետությունների ղեկավարները համաձայնեն, Բելառուսը կառաջարկի հանդիպումը անցկացնել բացառապես նեղ կազմով՝ երաշխավորելով ժամանած պատվիրակությունների յուրաքանչյուր անդամի լիակատար անվտանգությունը:

Այս քննարկման անցկացման այլընտրանքային տարբերակն, ըստ բելառուսական կողմի, կարող է լինել տեսահամաժողովը՝ Եվրասիական տնտեսական միության առաջնորդների մասնակցությամբ:

Այսպիսով, Փաշինյանն ու Լուկաշենկոն դժգոհ են ռուսական գազի գնի բարձր մակարդակից, համարում են, որ այն չի համապատասխանում համաշխարհային մակարդակին և ստեղծված իրավիճակին:
Ասենք ավելին՝ Ռուսաստանը Հայաստանի և Բելառուսի գործընկեր, ռազմավարական գործընկեր է համարվում, էլ երբ, եթե ոչ հիմա Ռուսաստանը պետք է աջակցի դաշնակից պետություններին:

Բայց ինչպես Ռուսաստանը շահն է թելադրում՝ օգնել օրինակ՝ Իտալիայի, այնպես էլ Հայաստանի և Բելառուսի ղեկավարները ստիպված են լինելու նման փոքր դժգոհություններով ուշադրություն հրավիրել իրենց վրա:
Ընդհանուր առմամբ այս հաղորդագրությունից կարելի է եզրակացնել, որ Փաշինյանն ու Լուկաշենկոն նախընտրել են հրապարակային դժգոհություն հայտնել, ինչը, թերևս, նշանակում է, որ կամ նրանք Պուտինի հետ նման քննարկում չեն կարողանում նախաձեռնել, կամ էլ՝ նախաձեռնել են, բայց բավարարված չեն արդյունքներից, եթե իհարկե, այդպիսիք կան:

Ի դեպ, արդեն հայտնի է, որ փոխվարչապետ Մհեր Գրիգորյանը կառավարության անունից Հայաստան մատակարարվող գազի գնի փոփոխության վերաբերյալ նոր բանակցություններ սկսելու նամակով դիմել է «Գազպրոմ» ՀԲԸ վարչության նախագահ Ալեքսեյ Միլլերին, հայտնում են կառավարության աշխատակազմից: Նամակում, մասնավորապես ասվում է. «Արդեն ակնհայտ է, որ կորոնավիրուսի հետևանքները բացասական ազդեցություն կունենան մեր երկրների սոցիալ-տնտեսական զարգացման վրա, և դա կհանգեցնի էներգառեսուրսների սպառման ծավալի անկմանը: Մենք, իհարկե, ամեն կերպ կխթանենք արտադրության և սպառման աճը, բայց նշված միջոցառումների արդյունավետության համար անհրաժեշտ է ապահովել մրցակցային միջավայր: Մենք բոլորս հասկանում ենք, որ Հայաստանում գազի գինը այս իմաստով ունի մեծ նշանակություն: Մենք նաև հասկանում ենք, որ մեր երկրների բարեկամական հարաբերությունների մասշտաբներն ու մակարդակը թույլ են տալիս մեզ և պահանջում են մեզնից ժամանակին բարձրացնել և քննարկել մեր երկրների, այդ թվում` առևտրատնտեսական համագործակցության կայուն զարգացման համար համակարգային նշանակություն ունեցող հարցեր»:

Փոխվարչապետը նամակում ընդգծել է նաև, որ հաշվի առնելով կանխատեսումներն ու համաշխարհային շուկաներում էներգառեսուրսների, այդ թվում՝ նավթի և գազի գների հետ կապված ընթացիկ իրավիճակը` ՀՀ կառավարությունը նպատակահարմար է համարում սկսել նոր բանակցություններ Հայաստան մատակարարվող գազի գնի փոփոխության վերաբերյալ: «Մասնավորապես, մենք պատեհաժամ ենք համարում Հայաստանի և Վրաստանի սահմանին հազար խորանարդ մետրի համար գազի գինը նվազեցնելու, ինչպես նաև գազի համար վճարումը ազգային արժույթով կատարելու վերաբերյալ կանոն սահմանելու հարցերի քննարկումը», - նշված է նամակում:
Ինչպես ասում են՝ սպասենք Մոսկվայի արձագանքին:

Մետաքսյա Շալունց