Ակտիվ սադրանքների ռեժիմում. Զարմանալու փոխարեն արժեր գործել

Մի քանի օր է, ինչ լարվածության որոշակի աճ կա հայ-ադրբեջանական սահմանին:
Երեկ ադրբեջանական կողմը ձեռնարկել էր դիվերսիոն ներթափանցման փորձ Տավուշի մարզի Նոյեմբերյանի շրջանի հայկական դիրքերի ուղղությամբ: ՊՆ-ի մամլո հաղորդագրությունում ասվում էր. «Հայկական դիրքապահ ուժերի գործողությունների շնորհիվ հակառակորդը հետ է շպրտվել, կորուստների վերաբերյալ տեղեկությունները ճշտվում են: Հայկական կողմը կորուստներ չունի, գործողությունների հետևանքով թեթև վիրավորում է ստացել երկու զինծառայող: Միաժամանակ հակառակորդը թիրախավորել է Բաղանիս և Ոսկևան գյուղերը, ինչի հետևանքով վիրավորում է ստացել Ոսկեվան համայնքի բնակիչ մեկ երեխա, որը այդ պահին գտնվել է պատշգամբում:

Սահմանագոտում իրավիճակը կայունացնելու և ադրբեջանական զինված ուժերի, այս դեպքում՝ սահմանապահ ծառայության ուժերի՝ պանդեմիայի պայմաններում ձեռնարկած անպատկառ գործողությունները սաստելու նպատակով ՀՀ զինված ուժերը դիմելու են իրավիճակին համարժեք գործողությունների, ինչի հետևանքների ամբողջ պատասխանատվությունը կրելու է Ադրբեջանի ռազմաքաղաքական ղեկավարությունը»:

Երեկ նաև ՀՀ ԱԳՆ-ն տարածեց մամլո հաղորդագրություն, որում խստորեն դատապարտեցին Ադրբեջանի կողմից իրավիճակը հայ-ադրբեջանական սահմանին սրելու փորձերը: «Հրադադարի՝ որևէ կերպ չհրահրված այս խախտումն որևէ արդարացում չունի, հատկապես այսօր, երբ աշխարհի բոլոր երկրների բժշկական ռեսուրսները մոբիլիզացված են նոր տիպի կորոնավիրուսի դեմ պայքարում: Այս գործողություններով Ադրբեջանը արհամարհում է միջազգային հանրության, մասնավորապես՝ ԵԱՀԿ Մինսկի խմբի համանախագահների և ՄԱԿ գլխավոր քարտուղարի՝ այս ժամանակաշրջանում զինադադարն անվերապահ պահպանելու և սադրիչ գործողություններից ձեռնպահ մնալու կոչերը: Այս ռազմական միջադեպը փաստում է, որ կամ ադրբեջանական կողմը չի վերահսկում սահմանին իր զինված ստորաբաժանումների գործողությունները, կամ գնում է իրադրության միտումնավոր սրման՝ կրելով դրա հետևանքների ողջ պատասխանատվությունը»:

Ստացվում է, հայկական կողմի համար բավական անսպասելի են եղել ադրբեջանական կողմի ձեռնարկած քայլերը: Մինչ այժմ այդ փորձերը սպասվա՞ծ են եղել... Մնում է անհասկանալի:

Սակայն միևնույն ժամանակ, արցախյան ընտրությունների ֆոնին ադրբեջանական «ջանքերը» բոլորովին էլ անսպասելի չեն, դրանք նույնիսկ սպասված էին, որովհետև բոլոր ընտրություններից առաջ և հետո ադրբեջանական կողմը նման քայլերի դիմել է:
Զարմանալին այն է, որ մեր արտաքին քաղաքական գերատեսչությունում զարմանում են ադրբեջանական պահվածքից:

Զարմանալու փոխարեն արժեր դեռ օրեր առաջ ԵԱՀԿ Մինսկի խմբի միջնորդների ու այլ կառույցների ուշադրությունը հրավիրել սանձարձակ Ալիևի պահվածքի վրա:

Մետաքսյա Շալունց